tum mein jo baat hai wo baat nahin aai hai

tum meñ jo baat hai vo baat nahīñ aa.ī hai

kyā ye tasvīr kisī ġhair se khiñchvā.ī hai

dekheñ kaisā tumheñ dā'vā-e-masīhā.ī hai

aaj bīmār ne marne kī qasam khaa.ī hai

bas ye rūdād-e-mohabbat yahīñ rahne diije

aage kahtā huuñ to sarkār kī rusvā.ī hai

kasrat-e-ranj-o-alam yās-o-tamanna kā hujūm

kitne hangāmoñ kī mehmāñ mirī tanhā.ī hai

kyoñ sunā.ūñ maiñ tujhe vā'da-ḳhilāfī terī

kyoñ kahalvā.ūñ ki dīvāna hai saudā.ī hai

ḳhuub sayyād satā jaur kar iizā pahuñchā

ab to taqdīr tire daam meñ le aa.ī hai

gosha-e-chashm se bāhar huī surme kī lakīr

ḳhair ho myaan se talvār nikal aa.ī hai

be-kasī meñ bhī marīz un kā akelā na rahe

vo udhar uTh ke ga.e aur qazā aa.ī hai

mahfil-e-ġhair meñ ai ashk na āñkhoñ se nikal

tere parde meñ kisī shoḳh kī rusvā.ī hai

qatra-e-ḳhūñ mire is soḳhta dil meñ hai kahāñ

koī hasrat tire paikāñ se lipaT aa.ī hai

ai 'qamar' chhup ke vo aa.eñ bhī to kyūñkar aa.eñ

chāñdnī aaj sar-e-shām nikal aa.ī hai

tum mein jo baat hai wo baat nahin aai hai

kya ye taswir kisi ghair se khinchwai hai

dekhen kaisa tumhein da'wa-e-masihai hai

aaj bimar ne marne ki qasam khai hai

bas ye rudad-e-mohabbat yahin rahne dije

aage kahta hun to sarkar ki ruswai hai

kasrat-e-ranj-o-alam yas-o-tamanna ka hujum

kitne hangamon ki mehman meri tanhai hai

kyon sunaun main tujhe wa'da-KHilafi teri

kyon kahalwaun ki diwana hai saudai hai

KHub sayyaad sata jaur kar iza pahuncha

ab to taqdir tere dam mein le aai hai

gosha-e-chashm se bahar hui surme ki lakir

KHair ho myan se talwar nikal aai hai

be-kasi mein bhi mariz un ka akela na rahe

wo udhar uTh ke gae aur qaza aai hai

mahfil-e-ghair mein ai ashk na aankhon se nikal

tere parde mein kisi shoKH ki ruswai hai

qatra-e-KHun mere is soKHta dil mein hai kahan

koi hasrat tere paikan se lipaT aai hai

ai 'qamar' chhup ke wo aaen bhi to kyunkar aaen

chandni aaj sar-e-sham nikal aai hai