tum mere KHwab-e-pareshan ka asar dekho to

tum mire ḳhvāb-e-pareshāñ kā asar dekho to

muzmahil saarā gulistāñ hai idhar dekho to

lab-o-āriz kī qasam jalva-e-raqsāñ kī qasam

kis qadar shoḳh hai vo rashk-e-qamar dekho to

shiddat-e-tishna-labī meñ dar-e-mai-ḳhāna par

rakh diyā phir kisī majbūr ne sar dekho to

talḳhiyāñ bhuul ke jazbāt pe qaabū rakh kar

tum ḳhudā ke liye ik baar idhar dekho to

kyā sitam is se ziyāda koī ho saktā hai

mausam-e-gul meñ kaTe haiñ mire par dekho to

jis se gumrāh zamāne ko ziyā miltī hai

ilm-o-irfān-o-hidāyāt kā vo dar dekho to

sab pareshāñ haiñ yahāñ kaun kahe un se 'sahar'

tum ġharīboñ ko kabhī ek nazar dekho to

tum mere KHwab-e-pareshan ka asar dekho to

muzmahil sara gulistan hai idhar dekho to

lab-o-ariz ki qasam jalwa-e-raqsan ki qasam

kis qadar shoKH hai wo rashk-e-qamar dekho to

shiddat-e-tishna-labi mein dar-e-mai-KHana par

rakh diya phir kisi majbur ne sar dekho to

talKHiyan bhul ke jazbaat pe qabu rakh kar

tum KHuda ke liye ek bar idhar dekho to

kya sitam is se ziyaada koi ho sakta hai

mausam-e-gul mein kaTe hain mere par dekho to

jis se gumrah zamane ko ziya milti hai

ilm-o-irfan-o-hidayat ka wo dar dekho to

sab pareshan hain yahan kaun kahe un se 'sahar'

tum gharibon ko kabhi ek nazar dekho to