tumne mahsus kahan meri zarurat ki hai

tum ne mahsūs kahāñ merī zarūrat kī hai

mere jazboñ kī kahāñ tum ne himāyat kī hai

haal pūchhā na kisī ne mere aañsū poñchhe

kyā kisī se bhī nahīñ maiñ ne mohabbat kī hai

ḳhush thī maiñ chhoTe se ghar meñ bhī tire pyaar ke saath

maiñ ne kab tujh se kisī mahl kī chāhat kī hai

sochtī huuñ maiñ yahī baiTh ke tanhā.ī meñ

kyā yaqīñ kar ke tirā maiñ ne himāqat kī hai

aaj phir shahr meñ uTThegā koī hañgāma

aaj sach kahne kī ik shaḳhs ne jur.at kī hai

kitnā roī huuñ tire ba.ad tujhe kyā ma.alūm

maiñ ne lamhoñ kī adā is tarah qīmat kī hai

kis tarah miltā 'siyā' saare zamāne se mizāj

baat kuchh aur nahīñ baat tabī.at kī hai

tum ne mahsus kahan meri zarurat ki hai

mere jazbon ki kahan tum ne himayat ki hai

haal puchha na kisi ne mere aansu ponchhe

kya kisi se bhi nahin main ne mohabbat ki hai

KHush thi main chhoTe se ghar mein bhi tere pyar ke sath

main ne kab tujh se kisi mahl ki chahat ki hai

sochti hun main yahi baiTh ke tanhai mein

kya yaqin kar ke tera main ne himaqat ki hai

aaj phir shahr mein uTThega koi hangama

aaj sach kahne ki ek shaKHs ne jurat ki hai

kitna roi hun tere baad tujhe kya malum

main ne lamhon ki ada is tarah qimat ki hai

kis tarah milta 'siya' sare zamane se mizaj

baat kuchh aur nahin baat tabiat ki hai