tum se kah den na baat kyon dil ki

tum se kah deñ na baat kyoñ dil kī

zabt-e-ġham ab hai baat mushkil kī

yaad kashtī kā Dūbnā aayā

baat kī jab kisī ne sāhil kī

sāhab-e-ġham na ġham kā zikr kare

ḳhuub rasmeñ haiñ un kī mahfil kī

ham ne ḳhud aa ke zer-e-teġh-e-sitam

laaj rakh lī hai azm-e-qātil kī

zarb-e-sayyād kī to deñ sab daad

kis ne parvā-e-murġh-e-bismil kī

mauj-e-dariyā-o-rang-e-lāla-o-gul

kitnī shakleñ haiñ ik mire dil kī

mujh ko ehsās-e-āmad-e-tūfāñ

aap ko fikr sair-e-sāhil kī

mastī-e-ahl-e-kārvāñ tauba

kuchh ḳhabar raah kī na manzil kī

un se kyā ho mo.āmla 'qāsid'

hai alag raah haqq-o-bātil kī

tum se kah den na baat kyon dil ki

zabt-e-gham ab hai baat mushkil ki

yaad kashti ka Dubna aaya

baat ki jab kisi ne sahil ki

sahab-e-gham na gham ka zikr kare

KHub rasmen hain un ki mahfil ki

hum ne KHud aa ke zer-e-tegh-e-sitam

laj rakh li hai azm-e-qatil ki

zarb-e-sayyaad ki to den sab dad

kis ne parwa-e-murgh-e-bismil ki

mauj-e-dariya-o-rang-e-lala-o-gul

kitni shaklen hain ek mere dil ki

mujh ko ehsas-e-amad-e-tufan

aap ko fikr sair-e-sahil ki

masti-e-ahl-e-karwan tauba

kuchh KHabar rah ki na manzil ki

un se kya ho moamla 'qasid'

hai alag rah haqq-o-baatil ki