tum se nahin mile to kisi se nahin mile

tum se nahīñ mile to kisī se nahīñ mile

milnā bhī paḌ gayā to ḳhushī se nahīñ mile

duniyā to kyā ki ḳhud se bhī karte rahe gurez

jab tak mile kisī se kisī se nahīñ mile

ham apne dushmanoñ se gale mil ke aa ga.e

jis ke liye ga.e the usī se nahīñ mile

āñkheñ vahī to haiñ jo mujhe DhūñDhtī raheñ

sūrat vahī to hai jo kisī se nahīñ mile

milne ko zindagī meñ sabhī kuchh milā magar

tum mil ga.e to log ḳhushī se nahīñ mile

jo be-talab thā us kī hameñ justujū rahī

jo milnā chāhtā thā usī se nahīñ mile

dekho ye dil abhī se bayābāñ-navard hai

milnā na ho jise vo abhī se nahīñ mile

tum se nahin mile to kisi se nahin mile

milna bhi paD gaya to KHushi se nahin mile

duniya to kya ki KHud se bhi karte rahe gurez

jab tak mile kisi se kisi se nahin mile

hum apne dushmanon se gale mil ke aa gae

jis ke liye gae the usi se nahin mile

aankhen wahi to hain jo mujhe DhunDhti rahen

surat wahi to hai jo kisi se nahin mile

milne ko zindagi mein sabhi kuchh mila magar

tum mil gae to log KHushi se nahin mile

jo be-talab tha us ki hamein justuju rahi

jo milna chahta tha usi se nahin mile

dekho ye dil abhi se bayaban-naward hai

milna na ho jise wo abhi se nahin mile