tum se rah-o-rasm baDha kar diwane kahlaen kyun

tum se rāh-o-rasm baḌhā kar dīvāne kahlā.eñ kyuuñ

jin galiyoñ meñ patthar barseñ un galiyoñ meñ jaa.eñ kyuuñ

vaise hī tārīk bahut haiñ lamhe ġham kī rātoñ ke

phir mere ḳhvāboñ meñ yaaro vo gesū lahrā.eñ kyuuñ

majbūroñ kī is bastī meñ kis se pūchheñ kaun batā.e

apnā mohalla bhuul ga.ī haiñ be-chārī lailā.eñ kyuuñ

mustaqbil se aas bahut hai mustaqil kaisā bhī ho

maazī kis ke kaam aayā hai maazī ko dohrā.eñ kyuuñ

haañ ham ne bhī aaj kisī kā nāzuk sā dil toḌā hai

shahr-e-vafā kī rasm yahī hai ham is par sharmā.eñ kyuuñ

khiḌkī khiḌkī sannāTā hai chilman chilman tanhā.ī

chāhat kī mahfil meñ ab ham naqd-e-dil-o-jāñ laa.eñ kyuuñ

va.adoñ ke jañgal meñ 'āzar' ham to barsoñ bhaTke haiñ

aap kareñ kyuuñ dil pe bharosa aap ye dhoka khā.eñ kyuuñ

tum se rah-o-rasm baDha kar diwane kahlaen kyun

jin galiyon mein patthar barsen un galiyon mein jaen kyun

waise hi tarik bahut hain lamhe gham ki raaton ke

phir mere KHwabon mein yaro wo gesu lahraen kyun

majburon ki is basti mein kis se puchhen kaun batae

apna mohalla bhul gai hain be-chaari lailaen kyun

mustaqbil se aas bahut hai mustaqil kaisa bhi ho

mazi kis ke kaam aaya hai mazi ko dohraen kyun

han hum ne bhi aaj kisi ka nazuk sa dil toDa hai

shahr-e-wafa ki rasm yahi hai hum is par sharmaen kyun

khiDki khiDki sannaTa hai chilman chilman tanhai

chahat ki mahfil mein ab hum naqd-e-dil-o-jaan laen kyun

wadon ke jangal mein 'azar' hum to barson bhaTke hain

aap karen kyun dil pe bharosa aap ye dhoka khaen kyun