tum siyasat mein ho jo chahe naya karte raho

tum siyāsat meñ ho jo chāhe nayā karte raho

par katar ke in parindoñ ko rihā karte raho

dukh ke sab bādal chhaTeñge dhuup khul kar aa.egī

mas.ale par tum baḌoñ se mashvara karte raho

ham ne ye ta.alīm paa.ī hai nabī-e-pāk se

dushmanoñ ke haq meñ bhī rab se duā karte raho

tum bhī gin sakte ho taare āsmāñ ke haañ magar

shart itnī hai musalsal ratjagā karte raho

barkateñ baḌh jā.eñgī ghar meñ tumhāre dekhnā

ho sake to muflisoñ kā haq adā karte raho

tinkā tinkā joḌ kar ta.amīr hotā hai mahal

is liye har din nayā kuchh tajraba karte raho

tum siyasat mein ho jo chahe naya karte raho

par katar ke in parindon ko riha karte raho

dukh ke sab baadal chhaTenge dhup khul kar aaegi

masale par tum baDon se mashwara karte raho

hum ne ye talim pai hai nabi-e-pak se

dushmanon ke haq mein bhi rab se dua karte raho

tum bhi gin sakte ho tare aasman ke han magar

shart itni hai musalsal ratjaga karte raho

barkaten baDh jaengi ghar mein tumhaare dekhna

ho sake to muflison ka haq ada karte raho

tinka tinka joD kar tamir hota hai mahal

is liye har din naya kuchh tajraba karte raho