tum yaad na jaane kyon aae kyon guzra zamana yaad aaya

tum yaad na jaane kyoñ aa.e kyoñ guzrā zamāna yaad aaya

ham jis ko haqīqat samjhe the vo aaj fasāna yaad aaya

kyoñ rishta-e-ulfat TuuT gayā kyoñ haath se dāman chhūT gayā

kis tarah bhulā.ī yaad tirī vo aaj bhulānā yaad aaya

vo pichhlī mohabbat yaad aa.ī vo terī sharārat yaad aa.ī

vo kheñch ke chādar hāthoñ se sone se jagānā yaad aaya

vo niiñd tirī jagte jagte vo jaag tirī sote sote

vo husn-o-nazākat yaad aa.ī vo terā jagānā yaad aaya

sharminda-e-gul ruḳhsār tire resham sī mulā.em vo zulfeñ

āñkhoñ ke chhalakte sāġhar se vo mai kā pilānā yaad aaya

bāhoñ ko kabhī Daalā hans kar khīñchā to kabhī āñchal haT kar

vo aa ke ḳhushī se kuchh kahnā vo ruuTh ke jaanā yaad aaya

ye yaad rahe baaqī 'paikar' ye bhuul rahe baaqī 'paikar'

vo bhuul kī jis kī yaad aa.ī vo yaad bhulānā yaad aaya

tum yaad na jaane kyon aae kyon guzra zamana yaad aaya

hum jis ko haqiqat samjhe the wo aaj fasana yaad aaya

kyon rishta-e-ulfat TuT gaya kyon hath se daman chhuT gaya

kis tarah bhulai yaad teri wo aaj bhulana yaad aaya

wo pichhli mohabbat yaad aai wo teri shararat yaad aai

wo khench ke chadar hathon se sone se jagana yaad aaya

wo nind teri jagte jagte wo jag teri sote sote

wo husn-o-nazakat yaad aai wo tera jagana yaad aaya

sharminda-e-gul ruKHsar tere resham si mulaem wo zulfen

aankhon ke chhalakte saghar se wo mai ka pilana yaad aaya

bahon ko kabhi Dala hans kar khincha to kabhi aanchal haT kar

wo aa ke KHushi se kuchh kahna wo ruTh ke jaana yaad aaya

ye yaad rahe baqi 'paikar' ye bhul rahe baqi 'paikar'

wo bhul ki jis ki yaad aai wo yaad bhulana yaad aaya