tumhaara aaj mera kal nahin hai

tumhārā aaj merā kal nahīñ hai

magar māthe pe koī bal nahīñ hai

vo merī zindagī kā āḳhirī din

mu'ayyan hai magar kal-val nahīñ hai

kabhī hargiz bhī uchhlegī na kīchaḌ

pahāḌoñ ke tale daldal nahīñ hai

mohabbat meñ kamī aane na paa.e

chaTā.ī ghar meñ hai kambal nahīñ hai

zamāna ho gayā fariyād karte

ki dil meñ dard hai halchal nahīñ hai

siqa hazrāt kahte haiñ ki insāñ

qarīb-ul-marg hai pāgal nahīñ hai

burā ho āḳhir-e-shab mai-kashī kā

namāz-e-sā'at-e-avval nahīñ hai

zamāna hai agar ye haath aa jaa.e

ye ik lamha nahīñ ik pal nahīñ hai

milegī manzil-e-maqsūd shāyad

nazar se rāsta ojhal nahīñ hai

ye kahte sharm aatī hai 'nishāte'

ye merā shahr hai maqtal nahīñ hai

tumhaara aaj mera kal nahin hai

magar mathe pe koi bal nahin hai

wo meri zindagi ka aaKHiri din

mu'ayyan hai magar kal-wal nahin hai

kabhi hargiz bhi uchhlegi na kichaD

pahaDon ke tale daldal nahin hai

mohabbat mein kami aane na pae

chaTai ghar mein hai kambal nahin hai

zamana ho gaya fariyaad karte

ki dil mein dard hai halchal nahin hai

siqa hazraat kahte hain ki insan

qarib-ul-marg hai pagal nahin hai

bura ho aaKHir-e-shab mai-kashi ka

namaz-e-sa'at-e-awwal nahin hai

zamana hai agar ye hath aa jae

ye ek lamha nahin ek pal nahin hai

milegi manzil-e-maqsud shayad

nazar se rasta ojhal nahin hai

ye kahte sharm aati hai 'nishate'

ye mera shahr hai maqtal nahin hai