tumhaara hijr manaya to main akela tha

tumhārā hijr manāyā to maiñ akelā thā

junūñ ne hashr uThāyā to maiñ akelā thā

ye merī apnī duā.eñ jinhoñ ne radd ho kar

gale se mujh ko lagāyā to maiñ akelā thā

dayār-e-ḳhvāb thā tum the tamām duniyā thī

kisī ne aa ke jagāyā to maiñ akelā thā

koī husainī na niklā mire rafīqoñ meñ

diyā bujhā ke jalāyā to maiñ akelā thā

tumhārā haath nahīñ thā vo mauj-e-girya thī

mirī samajh meñ jab aaya to maiñ akelā thā

tumhāre lams kī ḳhushbū fareb niklī hai

badan ne hashr uThāyā to maiñ akelā thā

kahāñ se aa.ī thī āḳhir tirī talab mujh meñ

ḳhudā ne mujh ko banāyā to maiñ akelā thā

tumhaara hijr manaya to main akela tha

junun ne hashr uThaya to main akela tha

ye meri apni duaen jinhon ne radd ho kar

gale se mujh ko lagaya to main akela tha

dayar-e-KHwab tha tum the tamam duniya thi

kisi ne aa ke jagaya to main akela tha

koi husaini na nikla mere rafiqon mein

diya bujha ke jalaya to main akela tha

tumhaara hath nahin tha wo mauj-e-girya thi

meri samajh mein jab aaya to main akela tha

tumhaare lams ki KHushbu fareb nikli hai

badan ne hashr uThaya to main akela tha

kahan se aai thi aaKHir teri talab mujh mein

KHuda ne mujh ko banaya to main akela tha