tumhaare bin ab ke jaan-e-jaan maine id karne ki Than li hai

tumhāre bin ab ke jān-e-jāñ maiñ ne iid karne kī Thaan lī hai

ġhamoñ ke ek ek pal se ḳhushiyāñ kashīd karne kī Thaan lī hai

maiñ us kī bātoñ kā zahr apnī ḳhamoshiyoñ meñ utaar lūñgā

agar muzir hai to maiñ ne us ko mufīd karne kī Thaan lī hai

talāsh kī shiddatoñ ne arz-o-samā kī sab dūriyāñ miTā diiñ

so maiñ ne ab terī justujū ko shadīd karne kī Thaan lī hai

machine bonā hai jin kā pesha unheñ zamīñ bech dī hai tum ne

kisān ho kar ḳhud apnī miTTī palīd karne kī Thaan lī hai

ye merī tahzīb kā asāsa hī merī pahchān ban sakegā

tamām kohna rivāyatoñ ko jadīd karne kī Thaan lī hai

siyāh shab kā ġhanīm shāyad ki aa gayā raushnī kī zad meñ

sabhī charāġhoñ ko jis ne 'āzim' shahīd karne kī Thaan lī hai

tumhaare bin ab ke jaan-e-jaan main ne id karne ki Than li hai

ghamon ke ek ek pal se KHushiyan kashid karne ki Than li hai

main us ki baaton ka zahr apni KHamoshiyon mein utar lunga

agar muzir hai to main ne us ko mufid karne ki Than li hai

talash ki shiddaton ne arz-o-sama ki sab duriyan miTa din

so main ne ab teri justuju ko shadid karne ki Than li hai

machine bona hai jin ka pesha unhen zamin bech di hai tum ne

kisan ho kar KHud apni miTTi palid karne ki Than li hai

ye meri tahzib ka asasa hi meri pahchan ban sakega

tamam kohna riwayaton ko jadid karne ki Than li hai

siyah shab ka ghanim shayad ki aa gaya raushni ki zad mein

sabhi charaghon ko jis ne 'azim' shahid karne ki Than li hai