tumhaare jism ko chhu kar mahak uTThi saba koi

tumhāre jism ko chhū kar mahak uTThī sabā koī

chalā ḳhushbū se ḳhushbū kā barābar silsila koī

bahut māyūs lauTī hai chaman se phir havā koī

ġhazal ke kahne vaale kah rahe haiñ marsiya koī

ḳhizāñ ke daur meñ gulshan ko kyā mahsūs hotā hai

ye nāzuk baat samjhegā bhī kaise bevafā koī

ye ham jāneñ hamārī naav jaane yā bhañvar jaane

hamārī kashmakash meñ ab na aa.e nā-ḳhudā koī

hamīñ ne jaan dī jis bāñkpan se jis qarīne se

ye hasrat rah ga.ī maqtal meñ aa kar dekhtā koī

sun ai patjhaḌ zamāna lag gayā terī hukūmat kā

guloñ ko ab nahīñ manzūr terā faisla koī

na jaane kyuuñ dhueñ kī ik lakīr uThtī hai is ghar se

kahīñ malbe ke nīche dab gayā jaltā diyā koī

abhī tak is zamīñ ke aadhe sar meñ dard baaqī hai

are chāragaro chhoḌo du'ā kar lo davā koī

tumhārī justujū meñ chhoḌ dī thī ham ne jannat bhī

vagarna is zamīñ par kaise hotā hādisa koī

irādoñ meñ zarā bijlī jagā ke dekh ai 'panchhī'

isī piñjre se niklegā chaman kā rāsta koī

tumhaare jism ko chhu kar mahak uTThi saba koi

chala KHushbu se KHushbu ka barabar silsila koi

bahut mayus lauTi hai chaman se phir hawa koi

ghazal ke kahne wale kah rahe hain marsiya koi

KHizan ke daur mein gulshan ko kya mahsus hota hai

ye nazuk baat samjhega bhi kaise bewafa koi

ye hum jaanen hamari naw jaane ya bhanwar jaane

hamari kashmakash mein ab na aae na-KHuda koi

hamin ne jaan di jis bankpan se jis qarine se

ye hasrat rah gai maqtal mein aa kar dekhta koi

sun ai patjhaD zamana lag gaya teri hukumat ka

gulon ko ab nahin manzur tera faisla koi

na jaane kyun dhuen ki ek lakir uThti hai is ghar se

kahin malbe ke niche dab gaya jalta diya koi

abhi tak is zamin ke aadhe sar mein dard baqi hai

are chaaragaro chhoDo du'a kar lo dawa koi

tumhaari justuju mein chhoD di thi hum ne jannat bhi

wagarna is zamin par kaise hota hadisa koi

iradon mein zara bijli jaga ke dekh ai 'panchhi'

isi pinjre se niklega chaman ka rasta koi