tumhaare nam se mahke hain sab gulzar ruh-e-man

tumhāre naam se mahke haiñ sab gulzār rūh-e-man

tumhārī yaad se raushan haiñ sab ash'ār rūh-e-man

gulāboñ meñ tumhārī narm palkoñ kī jhalak paa.ī

chamaktā chāñd nargis aur ruḳh-e-dil-dār rūh-e-man

suman ke lab pe Thahrī hai hayā kī shoḳh ḳhushbū bhī

hasīñ kaliyoñ meñ hai 'aks-e-lab-o-guftār rūh-e-man

mahak jaatī haiñ rāheñ jab tumhārī diid hotī hai

ki jaise mushk bikhrī ho sar-e-bāzār rūh-e-man

nazar uThtī nahīñ jugnū se chamke tere 'āriz par

ki jaise raat meñ khilte hoñ sab anvār rūh-e-man

ye duniyā baaġh ho yā phir chaman ho tum jahāñ rakh do

vahīñ par khil uThegā rang kā sansār rūh-e-man

mohabbat be-hisāb aisī ki maiñ ne ai nigār-e-jāñ

ġhazal kā maiñ ne rakkhā hai radīf is baar rūh-e-man

hai 'ādil' kā bhī dil mahv-e-tamannā ai matā'-e-zīst

tire dam se hai qaa.em husn kā me'yār rūh-e-man

tumhaare nam se mahke hain sab gulzar ruh-e-man

tumhaari yaad se raushan hain sab ash'ar ruh-e-man

gulabon mein tumhaari narm palkon ki jhalak pai

chamakta chand nargis aur ruKH-e-dil-dar ruh-e-man

suman ke lab pe Thahri hai haya ki shoKH KHushbu bhi

hasin kaliyon mein hai 'aks-e-lab-o-guftar ruh-e-man

mahak jati hain rahen jab tumhaari did hoti hai

ki jaise mushk bikhri ho sar-e-bazar ruh-e-man

nazar uThti nahin jugnu se chamke tere 'ariz par

ki jaise raat mein khilte hon sab anwar ruh-e-man

ye duniya bagh ho ya phir chaman ho tum jahan rakh do

wahin par khil uThega rang ka sansar ruh-e-man

mohabbat be-hisab aisi ki main ne ai nigar-e-jaan

ghazal ka main ne rakkha hai radif is bar ruh-e-man

hai 'adil' ka bhi dil mahw-e-tamanna ai mata'-e-zist

tere dam se hai qaem husn ka me'yar ruh-e-man