tumhaare wasl ka lamha bhi yun guzara tha

tumhāre vasl kā lamha bhī yuuñ guzārā thā

zabāñ pe she'r thā siine meñ ek aarā thā

nahīñ zamīñ pe akele nahīñ rahe ham log

ḳhudā ke baa'd koī aur bhī hamārā thā

havā ye pūchhtī phirtī hai har musāfir se

utāq-e-hijr se kis ne diyā utārā thā

tumhāre naam pe hote the din ke hangāme

tumhārī yaad ne sub.hoñ kā ruup dhārā thā

maiñ ek ḳhvāb meñ pahuñchā thā us kināre tak

vahāñ pe chaak thā kuuze the aur gaarā thā

vagarna maiñ kahāñ aatā ajal kī bātoñ meñ

mujhe to terī mohabbat ne aa ke maarā thā

isī liye to bulandī nahīñ milī mujh ko

falak se duur mire baḳht kā sitāra thā

maiñ ashk ashk girātā rahā nagīñ 'ārib'

magar ye haar pironā kise gavārā thā

tumhaare wasl ka lamha bhi yun guzara tha

zaban pe she'r tha sine mein ek aara tha

nahin zamin pe akele nahin rahe hum log

KHuda ke ba'd koi aur bhi hamara tha

hawa ye puchhti phirti hai har musafir se

utaq-e-hijr se kis ne diya utara tha

tumhaare nam pe hote the din ke hangame

tumhaari yaad ne subhon ka rup dhaara tha

main ek KHwab mein pahuncha tha us kinare tak

wahan pe chaak tha kuze the aur gara tha

wagarna main kahan aata ajal ki baaton mein

mujhe to teri mohabbat ne aa ke mara tha

isi liye to bulandi nahin mili mujh ko

falak se dur mere baKHt ka sitara tha

main ashk ashk giraata raha nagin 'arib'

magar ye haar pirona kise gawara tha