tumhaari shakl kisi shakl se milate hue

tumhārī shakl kisī shakl se milāte hue

maiñ kho gayā huuñ nayā rāsta banāte hue

mirā nasīb ki patjhaḌ meñ khil ga.e haiñ phuul

vo haath aa lagā hai haath āzmāte hue

maiñ jhuuT bol duuñ lekin burā to lagtā hai

tumhāre sher kisī aur ko sunāte hue

utar ke shāḳh se auroñ meñ ho gayā ābād

ki umr kaaT dī jis phuul ko khilāte hue

akelā maiñ nahīñ mujrim shab-e-visāl kā dost

thī terī phūñk bhī shāmil diyā bujhāte hue

tire jamāl kī rañgat nazar meñ rakhtā huuñ

maiñ canvās pe tasvīr-e-gul banāte hue

isī gumān meñ shab bhar sharāb piite rahe

ki ab vo haath ko rokegā haq jatāte hue

tumhaari shakl kisi shakl se milate hue

main kho gaya hun naya rasta banate hue

mera nasib ki patjhaD mein khil gae hain phul

wo hath aa laga hai hath aazmate hue

main jhuT bol dun lekin bura to lagta hai

tumhaare sher kisi aur ko sunate hue

utar ke shaKH se auron mein ho gaya aabaad

ki umr kaT di jis phul ko khilate hue

akela main nahin mujrim shab-e-visal ka dost

thi teri phunk bhi shamil diya bujhate hue

tere jamal ki rangat nazar mein rakhta hun

main canwas pe taswir-e-gul banate hue

isi guman mein shab bhar sharab pite rahe

ki ab wo hath ko rokega haq jatate hue