tumhaari yaad ka marham banam-e-dil kar dun

tumhārī yaad kā marham banām-e-dil kar duuñ

tamām hijr ke zaḳhmoñ ko mundamil kar duuñ

bahut zarūrī hai sahrā meñ ishq zinda rahe

so is ko kyoñ na atā apne āb-o-gil kar duuñ

abhī to dard mire dil meñ aarzī hai magar

sifārish aap jo farmā.eñ mustaqil kar duuñ

jo dāġh-e-ishq chamak uThe mere siine meñ

tamām māh-e-do-hafta ko maiñ ḳhajil kar duuñ

utar ga.ī haiñ tirī sab udāsiyāñ mujh meñ

so apnī saarī ḳhushī tujh ko muntaqil kar duuñ

harūf-e-shauq meñ laakh intishār ho 'ḳhālid'

ḳhayāl husn-e-sarāpā se maiñ sajil kar duuñ

tumhaari yaad ka marham banam-e-dil kar dun

tamam hijr ke zaKHmon ko mundamil kar dun

bahut zaruri hai sahra mein ishq zinda rahe

so is ko kyon na ata apne aab-o-gil kar dun

abhi to dard mere dil mein aarzi hai magar

sifarish aap jo farmaen mustaqil kar dun

jo dagh-e-ishq chamak uThe mere sine mein

tamam mah-e-do-hafta ko main KHajil kar dun

utar gai hain teri sab udasiyan mujh mein

so apni sari KHushi tujh ko muntaqil kar dun

haruf-e-shauq mein lakh intishaar ho 'KHalid'

KHayal husn-e-sarapa se main sajil kar dun