tumhaari yaad tari ho rahi hai

tumhārī yaad taarī ho rahī hai

baḌī hī yādgārī ho rahī hai

tumheñ to lauT kar aanā nahīñ hai

mujhe to intizārī ho rahī hai

mire andar koī laḌ mar rahā hai

baḌī taḳhrīb-kārī ho rahī hai

tire kūche meñ to sāzish huī thī

vahāñ kyuuñ āh-o-zārī ho rahī hai

tire andar kahāñ sabza ugegā

ḳhizāñ meñ kāsht-kārī ho rahī hai

mujhī pe Daal de saarā ḳhasāra

tujhe kyuuñ sharmsārī ho rahī hai

ye duniyā kī mohabbat aur ye duniyā

tumhārī thī tumhārī ho rahī hai

dar-e-aflāk se kyā jhāñktā hai

zamīñ pe mārā-mārī ho rahī hai

zamīñ par ek mulk aisā hai jis meñ

ġhazab kī dīn-dārī ho rahī hai

tumhaari yaad tari ho rahi hai

baDi hi yaadgari ho rahi hai

tumhein to lauT kar aana nahin hai

mujhe to intizari ho rahi hai

mere andar koi laD mar raha hai

baDi taKHrib-kari ho rahi hai

tere kuche mein to sazish hui thi

wahan kyun aah-o-zari ho rahi hai

tere andar kahan sabza ugega

KHizan mein kasht-kari ho rahi hai

mujhi pe Dal de sara KHasara

tujhe kyun sharmsari ho rahi hai

ye duniya ki mohabbat aur ye duniya

tumhaari thi tumhaari ho rahi hai

dar-e-aflak se kya jhankta hai

zamin pe mara-mari ho rahi hai

zamin par ek mulk aisa hai jis mein

ghazab ki din-dari ho rahi hai