tumhaari zulf ke charche pareshanon mein rahte hain

tumhārī zulf ke charche pareshānoñ meñ rahte haiñ

mirī dīvāngī ke zikr dīvānoñ meñ rahte haiñ

nahīñ parvā-e-īmāñ kāfirān-e-ishq ko hargiz

unheñ ka.aba se kyā matlab jo but-ḳhānoñ meñ rahte haiñ

talāsh us rashk-e-lailā kī jo rahtī hai hameñ har-dam

usī se qais ke mānind vo vīrānoñ meñ rahte haiñ

miyān-e-mahfil-e-ahbāb hai vo sham.a kī sūrat

ham us se lau lagā.e us ke parvānoñ meñ rahte haiñ

falak se baḌh ke rutba ho na kyuuñ kar qasr-e-jānāñ kā

malā.ek jis jagah adnā se darbānoñ meñ rahte haiñ

ajab hai nek sohbat kī na hotā sair insāñ meñ

mohazzab bante haiñ haivān jo insānoñ meñ rahte haiñ

na ho mazmūn aalī kyuuñ bhalā ash.ār 'ahqar' meñ

suḳhan-dānoñ se sohbat hai zabāñ-dānoñ meñ rahte haiñ

tumhaari zulf ke charche pareshanon mein rahte hain

meri diwangi ke zikr diwanon mein rahte hain

nahin parwa-e-iman kafiran-e-ishq ko hargiz

unhen kaba se kya matlab jo but-KHanon mein rahte hain

talash us rashk-e-laila ki jo rahti hai hamein har-dam

usi se qais ke manind wo viranon mein rahte hain

miyan-e-mahfil-e-ahbab hai wo shama ki surat

hum us se lau lagae us ke parwanon mein rahte hain

falak se baDh ke rutba ho na kyun kar qasr-e-jaanan ka

malaek jis jagah adna se darbanon mein rahte hain

ajab hai nek sohbat ki na hota sair insan mein

mohazzab bante hain haiwan jo insanon mein rahte hain

na ho mazmun aali kyun bhala ashaar 'ahqar' mein

suKHan-danon se sohbat hai zaban-danon mein rahte hain