tumhein mere KHayal ki musawwiri qubul ho

tumheñ mire ḳhayāl kī musavvirī qubūl ho

jadīd-tar fazā-e-alf-lailavī qubūl ho

haqīqatoñ kī talḳhiyoñ ke mas.ale kuchh aur haiñ

magar ḳhayāl-o-ḳhvāb kī ye shā.irī qubūl ho

tumhārā jism ma.abad-e-tasavvur-e-nashāt hai

mufakkir-e-bahār kī ye bandagī qubūl ho

ba-vasf-e-ilm-o-fan jinheñ kabhī sukūñ na mil sakā

bahut hai gar unheñ nashāt-e-ārzī qubūl ho

hayāt ḳhud mirī hī fikr kā hasīñ tilism hai

agar jahāñ ko bhī ye sehr-e-sāmrī qubūl ho

tumhāre husn ke tufail ḳhizr-e-shahr-e-raz ko bhī

'salām' aise shā.iroñ kī kaj-ravī qubūl ho

tumhein mere KHayal ki musawwiri qubul ho

jadid-tar faza-e-alf-lailawi qubul ho

haqiqaton ki talKHiyon ke masale kuchh aur hain

magar KHayal-o-KHwab ki ye shairi qubul ho

tumhaara jism mabad-e-tasawwur-e-nashat hai

mufakkir-e-bahaar ki ye bandagi qubul ho

ba-wasf-e-ilm-o-fan jinhen kabhi sukun na mil saka

bahut hai gar unhen nashat-e-arzi qubul ho

hayat KHud meri hi fikr ka hasin tilism hai

agar jahan ko bhi ye sehr-e-samri qubul ho

tumhaare husn ke tufail KHizr-e-shahr-e-raz ko bhi

'salam' aise shairon ki kaj-rawi qubul ho