turfa majun hai hamara yar

turfa ma.ajūn hai hamārā yaar

ġhair se ham-kanār ham se kanār

ham kaheñ baaġh chal to haañ na kahe

ġhair ke saath roz sair o shikār

ham ko majlis meñ dekh chup ho jaa.e

ġhair se Tok kar kare guftār

ham ko dekhe kahīñ to āñkheñ churā.e

ġhair ko dekh kar aap se ho do-chār

ġhair se saaf siina ho ke mile

ham se dil meñ rakhe hamesha ġhubār

ġhair jaur-o-jafā o be-mehrī

ham se is kā nahīñ hai aur shi.ār

ġhair kī baat sun ke ḳhush hove

ham se har baat meñ kare takrār

minnat-o-ijz-o-inkisār-o-niyāz

karte karte hue bahut lāchār

vo kisī tarah āshnā hī nahīñ

imtihāñ ham kiyā hai chandeñ yaar

zarā bhī kaan dhar kabhū na sune

dard-e-dil ham agar kareñ iz.hār

jaan aur maal de chukeñ us ko

dil se jaane hameñ agar ġham-ḳhvār

jo rahe ham se roz begāna

sohbat aise se kaise ho barrār

kar ilāhī tū mehrbāñ us ko

jis ke pīchhe hue haiñ zār-o-nizār

ġharaz ab shikva kab talak kiije

chup hī rahnā hai 'hātim' ab darkār

turfa majun hai hamara yar

ghair se ham-kanar hum se kanar

hum kahen bagh chal to han na kahe

ghair ke sath roz sair o shikar

hum ko majlis mein dekh chup ho jae

ghair se Tok kar kare guftar

hum ko dekhe kahin to aankhen churae

ghair ko dekh kar aap se ho do-chaar

ghair se saf sina ho ke mile

hum se dil mein rakhe hamesha ghubar

ghair jaur-o-jafa o be-mehri

hum se is ka nahin hai aur shiar

ghair ki baat sun ke KHush howe

hum se har baat mein kare takrar

minnat-o-ijz-o-inkisar-o-niyaz

karte karte hue bahut lachaar

wo kisi tarah aashna hi nahin

imtihan hum kiya hai chanden yar

zara bhi kan dhar kabhu na sune

dard-e-dil hum agar karen izhaar

jaan aur mal de chuken us ko

dil se jaane hamein agar gham-KHwar

jo rahe hum se roz begana

sohbat aise se kaise ho barrar

kar ilahi tu mehrban us ko

jis ke pichhe hue hain zar-o-nizar

gharaz ab shikwa kab talak kije

chup hi rahna hai 'hatim' ab darkar