tu aapko poshida o iKHfa na samajhna

tū aap ko poshīda o iḳhfā na samajhnā

maiñ dekh rahā huuñ mujhe andhā na samajhnā

kam sher-e-zhiyāñ se mirā rutba na samajhnā

kuttā huuñ alī kā sag-e-duniyā na samajhnā

go zaar huā huuñ magar imdād-e-junūñ se

hai dev kī tāqat mujhe murdā na samajhnā

ham-rāh mire rahtī hai har dam madad-e-ġhaib

lākhoñ pe huuñ bhārī mujhe tanhā na samajhnā

bazm-e-ġham-e-shappīr meñ jo chashm se nikle

har ashk ko tasbīh kā ik daana samajhnā

jo dil ki mubarrā ho mohabbat se jahāñ kī

us dil ko dilā yaar kā kāshāna samajhnā

naama jo likhā hai use rakh chhoḌiyo sāhib

vo ḳhatt-e-ġhulāmī hai navishtā na samajhnā

kāfir huuñ na phūñkūñ jo tire ka.aba meñ ai shaiḳh

nāqūs baġhal meñ hai musallā na samajhnā

dīdār dikhā dījiye ġhash aa.eñ to aa.eñ

āshiq huuñ maiñ āshiq mujhe muusā na samajhnā

rakhnā na tavaqqo.a dil-e-nādāñ tū kisī se

us vaqt meñ apnoñ ko bhī begāna samajhnā

hāsil nahīñ samjhāne se nāseh tū samajh to

kyā samjhe bhalā ye dil-e-dīvāna samajhnā

bahkā huā āshiq nazar aa jaa.e jo koī

is chashm-e-fusūñ-sāz kā dīvāna samajhnā

chāhūñ to nikal jā.ūñ abhī pech se tere

uljhā mujhe o zulf-e-chalīpā na samajhnā

sar kaT ke jo qadmoñ pe gire rāh-e-vafā meñ

ye bhī madad-e-himmat-e-mardāna samajhnā

sehhat tirī mumkin nahīñ sun rakh dil-e-bīmār

ye gorkan aayā hai masīhā na samajhnā

har haal meñ ḳhursand huuñ tum ḳhush ho ki nā-ḳhush

banda huuñ mujhe āshiq-e-shaidā na samajhnā

pilvā de mai-e-hosh-rubā dekh mirā zarf

saaqī jo bahak jā.ūñ to dīvāna samajhnā

aa jaa.e koī Dher agar paaoñ ke nīche

ai sham-ruḳho marqad-e-parvāna samajhnā

dekho kisī chehre pe jo gesū koī bal-dār

af.ī hai use zulf-e-chalīpā na samajhnā

juuyā hai agar rutba-e-ālī kā jahāñ meñ

adnā se bhī ḳhud ko kabhī aalā na samajhnā

ai 'rind' na Tiknā kabhī arbāb-e-vara.a paas

mil baiThnā us se jise rindāna samajhnā

tu aap ko poshida o iKHfa na samajhna

main dekh raha hun mujhe andha na samajhna

kam sher-e-zhiyan se mera rutba na samajhna

kutta hun ali ka sag-e-duniya na samajhna

go zar hua hun magar imdad-e-junun se

hai dew ki taqat mujhe murda na samajhna

ham-rah mere rahti hai har dam madad-e-ghaib

lakhon pe hun bhaari mujhe tanha na samajhna

bazm-e-gham-e-shappir mein jo chashm se nikle

har ashk ko tasbih ka ek dana samajhna

jo dil ki mubarra ho mohabbat se jahan ki

us dil ko dila yar ka kashana samajhna

nama jo likha hai use rakh chhoDiyo sahib

wo KHatt-e-ghulami hai nawishta na samajhna

kafir hun na phunkun jo tere kaba mein ai shaiKH

naqus baghal mein hai musalla na samajhna

didar dikha dijiye ghash aaen to aaen

aashiq hun main aashiq mujhe musa na samajhna

rakhna na tawaqqoa dil-e-nadan tu kisi se

us waqt mein apnon ko bhi begana samajhna

hasil nahin samjhane se naseh tu samajh to

kya samjhe bhala ye dil-e-diwana samajhna

bahka hua aashiq nazar aa jae jo koi

is chashm-e-fusun-saz ka diwana samajhna

chahun to nikal jaun abhi pech se tere

uljha mujhe o zulf-e-chalipa na samajhna

sar kaT ke jo qadmon pe gire rah-e-wafa mein

ye bhi madad-e-himmat-e-mardana samajhna

sehhat teri mumkin nahin sun rakh dil-e-bimar

ye gorkan aaya hai masiha na samajhna

har haal mein KHursand hun tum KHush ho ki na-KHush

banda hun mujhe aashiq-e-shaida na samajhna

pilwa de mai-e-hosh-ruba dekh mera zarf

saqi jo bahak jaun to diwana samajhna

aa jae koi Dher agar paon ke niche

ai sham-ruKHo marqad-e-parwana samajhna

dekho kisi chehre pe jo gesu koi bal-dar

afi hai use zulf-e-chalipa na samajhna

juya hai agar rutba-e-ali ka jahan mein

adna se bhi KHud ko kabhi aala na samajhna

ai 'rind' na Tikna kabhi arbab-e-wara pas

mil baiThna us se jise rindana samajhna