tu agar aata nahin apne KHayalon ko bhi rok

tū agar aatā nahīñ apne ḳhayāloñ ko bhī rok

bas chuke haiñ jo tasavvur meñ jamāloñ ko bhī rok

yaad aate biite lamhoñ ḳhush-ḳhisāloñ kī bhī rok

raat kī tanhā.iyoñ meñ aahoñ nāloñ ko bhī rok

raqs farmāne lagā hai biphre sāñpoñ kā hujūm

surḳh chehre pe machalte kaale bāloñ ko bhī rok

pahle bhī chashmāb kī jhīloñ meñ ik sailāb hai

āsmāñ par mad-bhare barfāb gāloñ ko bhī rok

ishtiyāq-e-dīd meñ faanī hai sahrāoñ kī ret

rah-navardī meñ ubharte ġham ke chhāloñ ko bhī rok

phir banā.eñge tujhe aġhyār kā daryūza-gar

in riyā-ḳhū ḳhush-nazar mas.hūr chāloñ ko bhī rok

zindagī ke rāstoñ par karte phirte haiñ shikār

nargisī āñkhoñ ke matvāle ġhazāloñ ko bhī rok

sar-kashī meñ jurm-o-istibdād meñ mashġhūl haiñ

dandanāte manchaloñ ko in razāloñ ko bhī rok

jo uḌāte haiñ tamasḳhur diin ke aa.iin par

ābrū-e-dīn kī ḳhātir jiyāloñ ko bhī rok

ik nazar kā umr bhar na de sake hargiz javāb

imtihān-e-ishq meñ uljhe savāloñ ko bhī rok

'ain' kartā hai parastish zaat meñ mastūr tū

pattharoñ kī but-parastī karne vāloñ ko bhī rok

tu agar aata nahin apne KHayalon ko bhi rok

bas chuke hain jo tasawwur mein jamalon ko bhi rok

yaad aate bite lamhon KHush-KHisalon ki bhi rok

raat ki tanhaiyon mein aahon nalon ko bhi rok

raqs farmane laga hai biphre sanpon ka hujum

surKH chehre pe machalte kale baalon ko bhi rok

pahle bhi chashmab ki jhilon mein ek sailab hai

aasman par mad-bhare barfab galon ko bhi rok

ishtiyaq-e-did mein fani hai sahraon ki ret

rah-nawardi mein ubharte gham ke chhaalon ko bhi rok

phir banaenge tujhe aghyar ka daryuza-gar

in riya-KHu KHush-nazar mashur chaalon ko bhi rok

zindagi ke raston par karte phirte hain shikar

nargisi aankhon ke matwale ghazalon ko bhi rok

sar-kashi mein jurm-o-istibdad mein mashghul hain

dandanate manchalon ko in razalon ko bhi rok

jo uDate hain tamasKHur din ke aain par

aabru-e-din ki KHatir jiyalon ko bhi rok

ek nazar ka umr bhar na de sake hargiz jawab

imtihan-e-ishq mein uljhe sawalon ko bhi rok

'ain' karta hai parastish zat mein mastur tu

pattharon ki but-parasti karne walon ko bhi rok