tu agar dil mein ek bar aae

tū agar dil meñ ek baar aa.e

umr bhar ke liye qarār aa.e

āshiyāna hī gulsitāñ meñ nahīñ

ab ḳhizāñ aa.e yā bahār aa.e

vo na aa.eñ to ai dam-e-āḳhir

lab pe naam un kā baar baar aa.e

maut ne aasrā diyā bhī to kab

jab musībat ke din guzār aa.e

yaas kahtī hai kuchh tamannā kuchh

kis kī bātoñ pe e'tibār aa.e

ye to kuchh talḳh thī mire saaqī

ab jo aa.e vo ḳhush-gavār aa.e

us ko terā payāmbar samjhūñ

maut agar vaqt-e-intizār aa.e

'arsh' vo be-qarāriyāñ na rahīñ

dil ko ab kis tarah qarār aa.e

tu agar dil mein ek bar aae

umr bhar ke liye qarar aae

aashiyana hi gulsitan mein nahin

ab KHizan aae ya bahaar aae

wo na aaen to ai dam-e-aKHir

lab pe nam un ka bar bar aae

maut ne aasra diya bhi to kab

jab musibat ke din guzar aae

yas kahti hai kuchh tamanna kuchh

kis ki baaton pe e'tibar aae

ye to kuchh talKH thi mere saqi

ab jo aae wo KHush-gawar aae

us ko tera payambar samjhun

maut agar waqt-e-intizar aae

'arsh' wo be-qarariyan na rahin

dil ko ab kis tarah qarar aae