tu bhi to ek lafz hai ek din mere bayan mein aa

tū bhī to ek lafz hai ik din mire bayāñ meñ aa

mere yaqīñ meñ gasht kar merī hadd-e-gumāñ meñ aa

nīñdoñ meñ dauḌtā huā terī taraf nikal gayā

tū bhī to ek din kabhī mere hisār-e-jāñ meñ aa

ik shab hamāre saath bhī ḳhanjar kī nok par kabhī

larzīda chashm-e-nam meñ chal jalte hue makāñ meñ aa

narġhe meñ dostoñ ke tū kab tak rahegā surḳh-rū

neza-ba-neza dū-ba-dū-saf-hā-e-dushmanāñ meñ aa

ik roz fikr-e-āb-o-nāñ tujh ko bhī ho jān-e-jahāñ

qaus-e-abad ko toḌ kar is arsa-e-ziyāñ meñ aa

tu bhi to ek lafz hai ek din mere bayan mein aa

mere yaqin mein gasht kar meri hadd-e-guman mein aa

nindon mein dauDta hua teri taraf nikal gaya

tu bhi to ek din kabhi mere hisar-e-jaan mein aa

ek shab hamare sath bhi KHanjar ki nok par kabhi

larzida chashm-e-nam mein chal jalte hue makan mein aa

narghe mein doston ke tu kab tak rahega surKH-ru

neza-ba-neza du-ba-du-saf-ha-e-dushmanan mein aa

ek roz fikr-e-ab-o-nan tujh ko bhi ho jaan-e-jahan

qaus-e-abad ko toD kar is arsa-e-ziyan mein aa