tu diwana hai tu nadan hai kya

tū dīvāna hai tū nādān hai kyā

junūn-e-ishq se anjān hai kyā

mirī māyūsiyāñ kyā dekhte ho

kisī chehre pe bhī muskān hai kyā

chalā aa.e koī bhī sar uThā ke

mire dil kī galī sunsān hai kyā

ghuTan duurī taḌap aañsū aur aaheñ

mohabbat kī Dagar āsān hai kyā

tū koshish kar ugegā pyaar terā

mirā dil koī registān hai kyā

dhaḌaktī hai ye har dil meñ azal se

mohabbat be-sar-o-sāmān hai kyā

samajh paayā na ye insān ab tak

mukammal ziist kī pahchān hai kyā

sabaq zinda-dilī kā dene vaalo

tumhāre jism meñ vo jaan hai kyā

ragoñ meñ dauḌtī hai be-īmānī

kise ma.alūm hai īmān hai kyā

'zahīn' ulfat kī ik buniyād bhī hai

hilā paanā ise āsān hai kyā

tu diwana hai tu nadan hai kya

junun-e-ishq se anjaan hai kya

meri mayusiyan kya dekhte ho

kisi chehre pe bhi muskan hai kya

chala aae koi bhi sar uTha ke

mere dil ki gali sunsan hai kya

ghuTan duri taDap aansu aur aahen

mohabbat ki Dagar aasan hai kya

tu koshish kar ugega pyar tera

mera dil koi registan hai kya

dhaDakti hai ye har dil mein azal se

mohabbat be-sar-o-saman hai kya

samajh paya na ye insan ab tak

mukammal zist ki pahchan hai kya

sabaq zinda-dili ka dene walo

tumhaare jism mein wo jaan hai kya

ragon mein dauDti hai be-imani

kise malum hai iman hai kya

'zahin' ulfat ki ek buniyaad bhi hai

hila pana ise aasan hai kya