tu faqat kahani sun hichkiyon ko bhul ja

tū faqat kahānī sun hichkiyoñ ko bhuul jā

ashk-bār log gin tāliyoñ ko bhuul jā

mausamoñ ne kyā kiyā ye kahānī chhoḌ de

bārishoñ ko bhuul jā pāniyoñ ko bhuul jā

ab zabāñ meñ aa ga.iiñ luknateñ rukāvaTeñ

merī guftugū kī tū narmiyoñ ko bhuul jā

zindagī hai muḳhtasar har 'inād chhoḌ de

ḳhūbiyoñ ko yaad rakh ḳhāmiyoñ ko bhuul jā

ye chaman tirā chaman phuul tere phuul haiñ

ḳhud hī dekh-bhāl kar māliyoñ ko bhuul jā

bhuul jā vo din kī niiñd raat kā vo jāgnā

jugnuoñ ko bhuul jā titliyoñ ko bhuul jā

vo hamāre bachpane kī kahānī thī faqat

shāh-zāde bhuul jā rāniyoñ ko bhuul jā

jis meñ jitnā zarf thā us ne vo dikhā diyā

merī baat maan jā talḳhiyoñ ko bhuul jā

'dānish'-e-shikasta-pā ab to vā'izoñ kī sun

mahfiloñ ko bhuul jā sāqiyoñ ko bhuul jā

tu faqat kahani sun hichkiyon ko bhul ja

ashk-bar log gin taliyon ko bhul ja

mausamon ne kya kiya ye kahani chhoD de

barishon ko bhul ja paniyon ko bhul ja

ab zaban mein aa gain luknaten rukawaTen

meri guftugu ki tu narmiyon ko bhul ja

zindagi hai muKHtasar har 'inad chhoD de

KHubiyon ko yaad rakh KHamiyon ko bhul ja

ye chaman tera chaman phul tere phul hain

KHud hi dekh-bhaal kar maliyon ko bhul ja

bhul ja wo din ki nind raat ka wo jagna

jugnuon ko bhul ja titliyon ko bhul ja

wo hamare bachpane ki kahani thi faqat

shah-zade bhul ja raniyon ko bhul ja

jis mein jitna zarf tha us ne wo dikha diya

meri baat man ja talKHiyon ko bhul ja

'danish'-e-shikasta-pa ab to wa'izon ki sun

mahfilon ko bhul ja saqiyon ko bhul ja