tu hi is shahr mein hai ek shanasa meri

tū hī is shahr meñ hai ek shanāsā merī

ab kahīñ le ke mujhe chal shab-e-tanhā merī

le gayā saath hī apne vo mere ḳhvāb-o-ḳhayāl

zindagī ab bhī vahī hai tah o baalā merī

us kī āñkhoñ meñ bhī pahchān ke Dore na mile

dil kī dhaḌkan bhī salāmat thī sarāpā merī

maiñ ki apnā hī pata pūchh rahā huuñ sab se

kho ga.ī jaane kahāñ umr-e-guzishta merī

chāñdnī jis ke sarāpā meñ simaT aa.ī thī

aañkh ab bhī hai usī husn kī juuyā merī

ab bhī ik bhiiḌ hai yūsuf ke ḳharīdāroñ kī

ab bhī istāda hai bāzār meñ duniyā merī

dosh par sar kī jagah turra-e-dastār mile

aañkh ab le le koī mujh se ḳhudā-yā merī

tu hi is shahr mein hai ek shanasa meri

ab kahin le ke mujhe chal shab-e-tanha meri

le gaya sath hi apne wo mere KHwab-o-KHayal

zindagi ab bhi wahi hai tah o baala meri

us ki aankhon mein bhi pahchan ke Dore na mile

dil ki dhaDkan bhi salamat thi sarapa meri

main ki apna hi pata puchh raha hun sab se

kho gai jaane kahan umr-e-guzishta meri

chandni jis ke sarapa mein simaT aai thi

aankh ab bhi hai usi husn ki juya meri

ab bhi ek bhiD hai yusuf ke KHaridaron ki

ab bhi istada hai bazar mein duniya meri

dosh par sar ki jagah turra-e-dastar mile

aankh ab le le koi mujh se KHuda-ya meri