tu kisi aur ki hai baat ye sochi to na thi

tū kisī aur kī hai baat ye sochī to na thī

bevafā.ī tirī aadat sahī achchhī to na thī

har sahelī tirī kartī rahī jis kī tārīf

tere hāthoñ pe lahū thā mirā mehñdī to na thī

tū jo aayā to mire chehre pe lauTī raunaq

tujh se pahle mirī hālat kabhī aisī to na thī

terī yādoñ kī kasak hai ki baḌhī jaatī hai

ye havā raat tirī samt se guzrī to na thī

jaane kyoñ tū use kartā rahā barbād sadā

vo jo ik dil thā mirā vo koī dehlī to na thī

chhoḌ kar jis ko tirī samt chalā aayā huuñ

tujh se achchhī thī vo lekin tire jaisī to na thī

kaifiyat us kī na dekhī ga.ī ham se 'āqib'

maslahat yuuñ kabhī bāzār meñ baiThī to na thī

tu kisi aur ki hai baat ye sochi to na thi

bewafai teri aadat sahi achchhi to na thi

har saheli teri karti rahi jis ki tarif

tere hathon pe lahu tha mera mehndi to na thi

tu jo aaya to mere chehre pe lauTi raunaq

tujh se pahle meri haalat kabhi aisi to na thi

teri yaadon ki kasak hai ki baDhi jati hai

ye hawa raat teri samt se guzri to na thi

jaane kyon tu use karta raha barbaad sada

wo jo ek dil tha mera wo koi dehli to na thi

chhoD kar jis ko teri samt chala aaya hun

tujh se achchhi thi wo lekin tere jaisi to na thi

kaifiyat us ki na dekhi gai hum se 'aqib'

maslahat yun kabhi bazar mein baiThi to na thi