tu koi KHwab nahin jis se kinara kar len

tū koī ḳhvāb nahīñ jis se kinārā kar leñ

kyuuñ na pahle se ta.alluq pe guzārā kar leñ

aisī vahshat hai ki kamre meñ paḌe sochte haiñ

kholīñ khiḌkī koī manzar hī gavārā kar leñ

hāsil-e-vasl se dilkash hai miyāñ ḳhvāhish-e-vasl

hijr darpesh jo hai, us pe guzārā kar leñ

ham ne tāḳhīr se sīkhe haiñ mohabbat ke usuul

ham pe lāzim hai, tirā ishq dobāra kar leñ

ye bhī mumkin hai tujhe dil se bhulā deñ, ham log

ye bhī mumkin hai tujhe jaan se pyārā kar leñ

tu koi KHwab nahin jis se kinara kar len

kyun na pahle se talluq pe guzara kar len

aisi wahshat hai ki kamre mein paDe sochte hain

kholin khiDki koi manzar hi gawara kar len

hasil-e-wasl se dilkash hai miyan KHwahish-e-wasl

hijr darpesh jo hai, us pe guzara kar len

hum ne taKHir se sikhe hain mohabbat ke usul

hum pe lazim hai, tera ishq dobara kar len

ye bhi mumkin hai tujhe dil se bhula den, hum log

ye bhi mumkin hai tujhe jaan se pyara kar len