tu meri manzil hai tera rasta main

tū merī manzil hai terā rasta maiñ

nāzāñ huuñ ho kar tujh se vābasta maiñ

jaan ke bhī anjān banī rahtī hai tū

paas kabhī aa jā.ūñ jo āhista maiñ

pyaar kī ḳhushbū se mahkātā huuñ mahfil

apne aap meñ phūloñ kā guldasta maiñ

varna kaun sune kam-zarfoñ ke ta.ane

majbūrī ke baa.is huuñ lab-basta maiñ

vo jo ayaañ ho kar bhī nihāñ hai aaj talak

apnī zaat meñ vo rāz-e-sar-basta maiñ

narmī se pesh aatā huuñ har ek se 'shād'

ya.anī apne aap meñ huuñ shā.ista maiñ

tu meri manzil hai tera rasta main

nazan hun ho kar tujh se wabasta main

jaan ke bhi anjaan bani rahti hai tu

pas kabhi aa jaun jo aahista main

pyar ki KHushbu se mahkata hun mahfil

apne aap mein phulon ka guldasta main

warna kaun sune kam-zarfon ke tane

majburi ke bais hun lab-basta main

wo jo ayan ho kar bhi nihan hai aaj talak

apni zat mein wo raaz-e-sar-basta main

narmi se pesh aata hun har ek se 'shad'

yani apne aap mein hun shaista main