tu ne gham KHwah-maKHwah us ka uThaya hua hai

tū ne ġham ḳhvāh-maḳhvāh us kā uThāyā huā hai

dil ye nādāñ to kisī aur pe aayā huā hai

is zamāne ko dikhāne ke liye chehre par

ham ne ik chehra-e-shādāb chaḌhāyā huā hai

rāt-bhar chāñd-sitāroñ se sajāte haiñ use

ham ne jis ghar ko tasavvur meñ basāyā huā hai

ek chehra jise ham ne bhī nahīñ dekhā kabhī

apnī āñkhoñ meñ zamāne se chhupāyā huā hai

sahal lagtā hai tujhe kyā safar-e-sher-o-suḳhan

umr-bhar dhuup meñ jhulse haiñ to saaya huā hai

vird karte the kabhī jis kā shab-o-roz 'salīm'

jaane kyā naam thā ab dil ne bhulāyā huā hai

tu ne gham KHwah-maKHwah us ka uThaya hua hai

dil ye nadan to kisi aur pe aaya hua hai

is zamane ko dikhane ke liye chehre par

hum ne ek chehra-e-shadab chaDhaya hua hai

raat-bhar chand-sitaron se sajate hain use

hum ne jis ghar ko tasawwur mein basaya hua hai

ek chehra jise hum ne bhi nahin dekha kabhi

apni aankhon mein zamane se chhupaya hua hai

sahal lagta hai tujhe kya safar-e-sher-o-suKHan

umr-bhar dhup mein jhulse hain to saya hua hai

wird karte the kabhi jis ka shab-o-roz 'salim'

jaane kya nam tha ab dil ne bhulaya hua hai