tu ne nazar se pyas ki dekha bhi hai kahin

tū ne nazar se pyaas kī dekhā bhī hai kahīñ

gard-e-jabīn-e-dasht meñ dariyā bhī hai kahīñ

phirtā rahā huuñ jis ke ta.āqub meñ umr-bhar

kyā naqsh us ḳhayāl ne chhoḌā bhī hai kahīñ

yā sab hī merī tarah ke āvāra-gard the

dil meñ koī qarār se baiThā bhī hai kahīñ

ham bhī ajab the ġhāroñ meñ utre ye dekhne

bach kar nikalne kā koī rasta bhī hai kahīñ

kuchh dekhte ki ḳhaak meñ haiñ dafn ḳhvāb kyā

ye gard-bād lamhe ko Thahrā bhī hai kahīñ

phūloñ kī samt haath baḌhāo ye soch kar

af.ī siyāh shāḳh se lipTā bhī hai kahīñ

saarī sadā.eñ ġhaib se aatī nahīñ 'shafaq'

koī zarūr dasht meñ baiThā bhī hai kahīñ

tu ne nazar se pyas ki dekha bhi hai kahin

gard-e-jabin-e-dasht mein dariya bhi hai kahin

phirta raha hun jis ke taaqub mein umr-bhar

kya naqsh us KHayal ne chhoDa bhi hai kahin

ya sab hi meri tarah ke aawara-gard the

dil mein koi qarar se baiTha bhi hai kahin

hum bhi ajab the ghaaron mein utre ye dekhne

bach kar nikalne ka koi rasta bhi hai kahin

kuchh dekhte ki KHak mein hain dafn KHwab kya

ye gard-baad lamhe ko Thahra bhi hai kahin

phulon ki samt hath baDhao ye soch kar

afi siyah shaKH se lipTa bhi hai kahin

sari sadaen ghaib se aati nahin 'shafaq'

koi zarur dasht mein baiTha bhi hai kahin