tu pazhmurda peDon ko yun ba-samar rakh

tū pazhmurda peḌoñ ko yuuñ bā-samar rakh

tavānā.ī de shāḳh ko bā-asar rakh

na kar faḳhr ajdād ke tū shajar par

tū shāḳhoñ pe ḳhud kāvishoñ kā samar rakh

hai inkār karnā bahut sahl-o-āsāñ

tū iqrār kā hausla ai bashar rakh

zamīnī haqā.eq raheñ tere aage

nazar apnī chāhe sadā charḳh par rakh

na ho jaa.e mānind-e-ātish sarāpā

mire dil kī ai jān-e-jānāñ ḳhabar rakh

kar ihqāq-e-haq aur ibtāl-e-bātil

ye jazba har ik moḌ par be-ḳhatar rakh

sabhī kī mohabbat samā jaa.e dil meñ

tū is meñ hamesha mohabbat kā ghar rakh

guhar ḳhud hī aa jā.egā paas 'ainī'

nihāyat pe manzil kī gahrī nazar rakh

tu pazhmurda peDon ko yun ba-samar rakh

tawanai de shaKH ko ba-asar rakh

na kar faKHr ajdad ke tu shajar par

tu shaKHon pe KHud kawishon ka samar rakh

hai inkar karna bahut sahl-o-asan

tu iqrar ka hausla ai bashar rakh

zamini haqaeq rahen tere aage

nazar apni chahe sada charKH par rakh

na ho jae manind-e-atish sarapa

mere dil ki ai jaan-e-jaanan KHabar rakh

kar ihqaq-e-haq aur ibtal-e-baatil

ye jazba har ek moD par be-KHatar rakh

sabhi ki mohabbat sama jae dil mein

tu is mein hamesha mohabbat ka ghar rakh

guhar KHud hi aa jaega pas 'aini'

nihayat pe manzil ki gahri nazar rakh