tu zid se shab-e-wasl na aaya to hua kya

tū zid se shab-e-vasl na aayā to huā kyā

ham mar na ga.e dil ko kuḌhāyā to huā kyā

tasvīr-e-nihālī se ham-āġhosh rahe ham

gar aa ke na saath apne sulāyā to huā kyā

dekhā hī kiye tere tasavvur meñ qamar ko

gar tā-sahar ai yaar! jagāyā to huā kyā

phūloñ kī rahī sej jo ḳhālī to balā se

añgāroñ pe gar ham ko liTāyā to huā kyā

muñh laal huā ġhuncha-sifat ḳhūn-e-jigar se

hāthoñ se tire paan na khāyā to huā kyā

behtar ye huā nāma-o-paiġhām se chhūTe

gar aap na aayā na bulāyā to huā kyā

dushman kā uḌāne ko dhuāñ ye bhī bahut haiñ

ġhairoñ ke sikhāne se jalāyā to huā kyā

mar jaane se to ham rahe juuñ panja-e-marjāñ

haath apnā jo mehñdī se bañdhāyā to huā kyā

tū aap hī dekh uñgliyoñ kī fundaqeñ uudī

jāmun ke jo paudoñ ko lagāyā to huā kyā

dekhā hai bahut bhān-matī kā ye tamāshā

sarsoñ ko hathelī pe jamāyā to huā kyā

ham sarv-e-chaman dil kī har ik aah ko samjhe

apnā qad-e-mauzūñ na dikhāyā to huā kyā

ham ne bhī mohabbat ko tirī taaq pe rakkhā

abrū jo sū-e-ġhair hilāyā to huā kyā

ye yaad rahe ham bhī nahīñ yaad kareñge

gar tū ne hameñ dil se bhulāyā to huā kyā

mīnā-ba-baġhal āblā-e-dil se rahe ham

jām-e-mai-e-agul-gūñ na pilāyā to huā kyā

dam aur hī ik dostī kā yaar bhareñge

muñh juuñ na.e quliyāñ na lagāyā to huā kyā

mat kah ki tasavvur meñ ḳhat-e-sabz ke mere

gar 'shāh'-nasīr ashk bahāyā to huā kyā

hai dalne ko chhātī pe tirī muuñg ḳhat-e-sabz

gar zahr-e-ġham-e-hijr khilāyā to huā kyā

tu zid se shab-e-wasl na aaya to hua kya

hum mar na gae dil ko kuDhaya to hua kya

taswir-e-nihaali se ham-aghosh rahe hum

gar aa ke na sath apne sulaya to hua kya

dekha hi kiye tere tasawwur mein qamar ko

gar ta-sahar ai yar! jagaya to hua kya

phulon ki rahi sej jo KHali to bala se

angaron pe gar hum ko liTaya to hua kya

munh lal hua ghuncha-sifat KHun-e-jigar se

hathon se tere pan na khaya to hua kya

behtar ye hua nama-o-paigham se chhuTe

gar aap na aaya na bulaya to hua kya

dushman ka uDane ko dhuan ye bhi bahut hain

ghairon ke sikhane se jalaya to hua kya

mar jaane se to hum rahe jun panja-e-marjaan

hath apna jo mehndi se bandhaya to hua kya

tu aap hi dekh ungliyon ki fundaqen udi

jamun ke jo paudon ko lagaya to hua kya

dekha hai bahut bhan-mati ka ye tamasha

sarson ko hatheli pe jamaya to hua kya

hum sarw-e-chaman dil ki har ek aah ko samjhe

apna qad-e-mauzun na dikhaya to hua kya

hum ne bhi mohabbat ko teri taq pe rakkha

abru jo su-e-ghair hilaya to hua kya

ye yaad rahe hum bhi nahin yaad karenge

gar tu ne hamein dil se bhulaya to hua kya

mina-ba-baghal aabla-e-dil se rahe hum

jam-e-mai-e-agul-gun na pilaya to hua kya

dam aur hi ek dosti ka yar bharenge

munh jun nae quliyan na lagaya to hua kya

mat kah ki tasawwur mein KHat-e-sabz ke mere

gar 'shah'-nasir ashk bahaya to hua kya

hai dalne ko chhati pe teri mung KHat-e-sabz

gar zahr-e-gham-e-hijr khilaya to hua kya