tufan-e-mohabbat lakh uThe tufan se lekin hasil kya

tūfān-e-mohabbat laakh uThe tūfān se lekin hāsil kyā

jo Duub ga.ī vo kashtī kyā jo haath aayā vo sāhil kyā

ye barq-o-sharar ye shams-o-qamar dete haiñ nishān-e-manzil kyā

ai dost hameñ ho saktā hai andāza-e-rañg-e-mahfil kyā

kyā kahiye ki dard-e-furqat se 'ehsās' taḌaptā hai dil kyā

taskīn to maanā mumkin hai taskīn se lekin hāsil kyā

ham duur se kyā andāza kareñ kyā nāz-o-niyāz-e-ulfat the

parvāne se hone vaalī thī tauhīn-e-mazāq-e-mahfil kyā

hai rāh-e-mohabbat rāh-e-razā andesha-e-sūd-o-ziyāñ kaisā

maiñ kyuuñ dekhūñ āsān hai kyā maiñ kyuuñ dekhūñ hai mushkil kyā

tauhīn-talab tauhīn-e-junūñ tauhīn urūj-e-manzil hai

maiñ jis pe pahuñch jā.ūñ hamdam ho saktī hai merī manzil kyā

iz.hār-e-ġham-e-dil karnā to 'ehsās' ba-har-hāl āsāñ hai

ashkoñ kī faqat do būñdoñ kā āñkhoñ se nikalnā mushkil kyā

tufan-e-mohabbat lakh uThe tufan se lekin hasil kya

jo Dub gai wo kashti kya jo hath aaya wo sahil kya

ye barq-o-sharar ye shams-o-qamar dete hain nishan-e-manzil kya

ai dost hamein ho sakta hai andaza-e-rang-e-mahfil kya

kya kahiye ki dard-e-furqat se 'ehsas' taDapta hai dil kya

taskin to mana mumkin hai taskin se lekin hasil kya

hum dur se kya andaza karen kya naz-o-niyaz-e-ulfat the

parwane se hone wali thi tauhin-e-mazaq-e-mahfil kya

hai rah-e-mohabbat rah-e-raza andesha-e-sud-o-ziyan kaisa

main kyun dekhun aasan hai kya main kyun dekhun hai mushkil kya

tauhin-talab tauhin-e-junun tauhin uruj-e-manzil hai

main jis pe pahunch jaun hamdam ho sakti hai meri manzil kya

izhaar-e-gham-e-dil karna to 'ehsas' ba-har-haal aasan hai

ashkon ki faqat do bundon ka aankhon se nikalna mushkil kya