tufan samundar ke na dariya ke bhanwar dekh

tūfān samundar ke na dariyā ke bhañvar dekh

sāhil kī tamannā hai to maujoñ kā safar dekh

ḳhushiyoñ kā ḳhazīna tah-e-dāmān-e-alam hai

guzre shab-e-tārīk to phir nūr-e-sahar dekh

uḌ jaanā falak tak koī mushkil nahīñ lekin

sūraj ke tamāzat se jhulas jaa.eñ na par dekh

me.arāj hai me.arāj tire zauq-e-nazar kī

har manzar-e-dil-kash yahī kahtā hai udhar dekh

chashme haiñ na dariyā na samundar hai na jhīleñ

hai pyaas ki aalam haiñ sarāboñ kā safar dekh

Takrā.eñ to sahrāoñ meñ bhī aag lagā deñ

poshīda rag-e-sañg meñ haiñ kitne sharar dekh

tū ne to mirī samt se muñh moḌ liyā hai

ab hotī hai kis tarah mirī umr basar dekh

tū apnī hifāzat kī duā maañg chukā hai

ab baiTh ke ḳhalvat meñ duāoñ kā asar dekh

is kār-gah-e-dahr meñ ai rahmat-e-ālam

ik maiñ hī nahīñ sab haiñ tire dast-e-nigar dekh

kyā tah meñ samundar kī 'guhar' DhūñD rahā hai

merī sadaf-e-chashm meñ ashkoñ ke 'guhar' dekh

tufan samundar ke na dariya ke bhanwar dekh

sahil ki tamanna hai to maujon ka safar dekh

KHushiyon ka KHazina tah-e-daman-e-alam hai

guzre shab-e-tarik to phir nur-e-sahar dekh

uD jaana falak tak koi mushkil nahin lekin

suraj ke tamazat se jhulas jaen na par dekh

mearaj hai mearaj tere zauq-e-nazar ki

har manzar-e-dil-kash yahi kahta hai udhar dekh

chashme hain na dariya na samundar hai na jhilen

hai pyas ki aalam hain sarabon ka safar dekh

Takraen to sahraon mein bhi aag laga den

poshida rag-e-sang mein hain kitne sharar dekh

tu ne to meri samt se munh moD liya hai

ab hoti hai kis tarah meri umr basar dekh

tu apni hifazat ki dua mang chuka hai

ab baiTh ke KHalwat mein duaon ka asar dekh

is kar-gah-e-dahr mein ai rahmat-e-alam

ek main hi nahin sab hain tere dast-e-nigar dekh

kya tah mein samundar ki 'guhar' DhunD raha hai

meri sadaf-e-chashm mein ashkon ke 'guhar' dekh