tur par apne kisi din bhi KHur-o-KHwab hai yan

tuur par apne kisī din bhī ḳhur-o-ḳhvāb hai yaañ

zindagānī kā bhalā kaun sā asbāb hai yaañ

chāh-e-sīmāb se sīmāb jo joshāñ hai hanūz

maiñ samajhtā huuñ ki madfūñ koī betāb hai yaañ

ḳham-e-abru kī tire kyūñke na tārīf karūñ

is se behtar bhī koī teġh-e-siyah-tāb hai yaañ

maqtal-e-ishq kī bhī kyā hī hai jā-e-khaTkī

ki na sar aur na sajda hai na mehrāb hai yaañ

merī turbat ke to āñgan meñ na Thahrā ik dam

ye tire jī meñ na aayā shab-e-mahtāb hai yaañ

kushtagāñ ko tirī shamshīr yahī kahtī hai

kījiye is pe qanā.at to dam-e-āb hai yaañ

is ko bhī gar na falak dekh sake char vaale

aur to kyā hai pareshānī kā asbāb hai yaañ

e'tibārāt haiñ ye hastī-e-mauhūmī ke

fil-haqīqat to koī ḳhaañ hai na navvāb hai yaañ

ḳhaak turbat kī mirī dekh chamaktī ahbāb

jī meñ kahte haiñ magar ma.adan-e-sīmāb hai yaañ

kyā ḳhat-e-āshiq-o-ma.ashūq ko koī samjhe

kuchh kināyat sī hai ādāb na alqāb hai yaañ

'mus.hafī' aap hī ham qatl haiñ apne hāthoñ

varna kiiñ ḳhvāh tū rustam hai na sohrāb hai yaañ

tur par apne kisi din bhi KHur-o-KHwab hai yan

zindagani ka bhala kaun sa asbab hai yan

chah-e-simab se simab jo joshan hai hanuz

main samajhta hun ki madfun koi betab hai yan

KHam-e-abru ki tere kyunke na tarif karun

is se behtar bhi koi tegh-e-siyah-tab hai yan

maqtal-e-ishq ki bhi kya hi hai ja-e-khaTki

ki na sar aur na sajda hai na mehrab hai yan

meri turbat ke to aangan mein na Thahra ek dam

ye tere ji mein na aaya shab-e-mahtab hai yan

kushtagan ko teri shamshir yahi kahti hai

kijiye is pe qanaat to dam-e-ab hai yan

is ko bhi gar na falak dekh sake char wale

aur to kya hai pareshani ka asbab hai yan

e'tibaraat hain ye hasti-e-mauhumi ke

fil-haqiqat to koi KHan hai na nawwab hai yan

KHak turbat ki meri dekh chamakti ahbab

ji mein kahte hain magar madan-e-simab hai yan

kya KHat-e-ashiq-o-mashuq ko koi samjhe

kuchh kinayat si hai aadab na alqab hai yan

'mushafi' aap hi hum qatl hain apne hathon

warna kin KHwah tu rustam hai na sohrab hai yan