TuTi hui kashti ko kinare bhi mile hain

TuuTī huī kashtī ko kināre bhī mile haiñ

tūfān se duniyā ko sahāre bhī mile haiñ

aġhyār hī ḳhālī nahīñ aġhyār kī saf meñ

dekhā hai to kuchh dost hamāre bhī mile haiñ

chhalke haiñ jahāñ jaam tirī bazm meñ saaqī

kuchh log vahīñ pyaas ke maare bhī mile haiñ

piine se qadam yuuñ to bahak jaate haiñ lekin

kuchh paañv jamāne ke sahāre bhī mile haiñ

do paas kī nadiyoñ meñ rah-o-rasm nahīñ hai

hālāñki kināre se kināre bhī mile haiñ

duniyā ke jahāñ daaġh nazar aa.e haiñ dil meñ

us dil meñ ka.ī zaḳhm tumhāre bhī mile haiñ

khoyā hai agar ek chamaktā huā sūraj

badle meñ ka.ī laakh sitāre bhī mile haiñ

duniyā meñ koī jaan se pyārā nahīñ hotā

kuchh log magar jaan se pyāre bhī mile haiñ

duniyā ko 'shamīm' aaj ke andāz-e-ġhazal meñ

kuchh zinda masā.il ke ishāre bhī mile haiñ

TuTi hui kashti ko kinare bhi mile hain

tufan se duniya ko sahaare bhi mile hain

aghyar hi KHali nahin aghyar ki saf mein

dekha hai to kuchh dost hamare bhi mile hain

chhalke hain jahan jam teri bazm mein saqi

kuchh log wahin pyas ke mare bhi mile hain

pine se qadam yun to bahak jate hain lekin

kuchh panw jamane ke sahaare bhi mile hain

do pas ki nadiyon mein rah-o-rasm nahin hai

haalanki kinare se kinare bhi mile hain

duniya ke jahan dagh nazar aae hain dil mein

us dil mein kai zaKHm tumhaare bhi mile hain

khoya hai agar ek chamakta hua suraj

badle mein kai lakh sitare bhi mile hain

duniya mein koi jaan se pyara nahin hota

kuchh log magar jaan se pyare bhi mile hain

duniya ko 'shamim' aaj ke andaz-e-ghazal mein

kuchh zinda masail ke ishaare bhi mile hain