TuTte jism ke mahtab bikhar ja mujh mein

TūTte jism ke mahtāb bikhar jā mujh meñ

maiñ chaḌhī raat kā dariyā huuñ utar jā mujh meñ

maiñ tirī yaad ke sāvan ko kahāñ barsā.ūñ

ab kī rut meñ koī bādal bhī na garjā mujh meñ

jaate qadmoñ kī koī chaap hī shāyad sun luuñ

Dūbte lamhoñ kī bārāt ubhar jā mujh meñ

jaane maiñ kaun se patjhaḌ meñ huā thā barbād

girte pattoñ kī ik āvāz hai har jā mujh meñ

koī mahkār hai ḳhushbū kī na rañgoñ kī lakīr

ek sahrā huuñ kahīñ se bhī guzar jā mujh meñ

ḳhatm hone de mire saath hī apnā bhī vajūd

tū bhī ik naqsh ḳharābe kā hai mar jā mujh meñ

koī har-gām 'musavvir' ye sadā detā hai

maiñ tirī āḳhirī manzil huuñ Thahar jā mujh meñ

TuTte jism ke mahtab bikhar ja mujh mein

main chaDhi raat ka dariya hun utar ja mujh mein

main teri yaad ke sawan ko kahan barsaun

ab ki rut mein koi baadal bhi na garja mujh mein

jate qadmon ki koi chap hi shayad sun lun

Dubte lamhon ki baraat ubhar ja mujh mein

jaane main kaun se patjhaD mein hua tha barbaad

girte patton ki ek aawaz hai har ja mujh mein

koi mahkar hai KHushbu ki na rangon ki lakir

ek sahra hun kahin se bhi guzar ja mujh mein

KHatm hone de mere sath hi apna bhi wajud

tu bhi ek naqsh KHarabe ka hai mar ja mujh mein

koi har-gam 'musawwir' ye sada deta hai

main teri aaKHiri manzil hun Thahar ja mujh mein