ubhar aaya ruKH par haya ka nagina

ubhar aayā ruḳh par hayā kā nagīna

jabīñ par na dekhā thā aisā pasīna

chalī aa rahī hai hasīnoñ kī Tolī

zamīñ par hai qaus-e-quzah kā qarīna

mire haath aa hī chalā thā kinārā

lagā Dūbne mere dil kā safīna

kasak soī rahtī hai barsoñ kabhī to

jo jaage to jaage mahīna mahīna

bhalā kaun jaane vo aa.eñ na aa.eñ

mire paas rahne hī do jām-o-mīnā

kabhī tum ne dekhī haiñ pur-ḳhār rāheñ

jo kahte ho ulfat ko phūloñ kā ziina

uḌā lī jo chorī se gāloñ kī chuTkī

to bole 'kañval' bhī hai kitnā kamīna

ubhar aaya ruKH par haya ka nagina

jabin par na dekha tha aisa pasina

chali aa rahi hai hasinon ki Toli

zamin par hai qaus-e-quzah ka qarina

mere hath aa hi chala tha kinara

laga Dubne mere dil ka safina

kasak soi rahti hai barson kabhi to

jo jage to jage mahina mahina

bhala kaun jaane wo aaen na aaen

mere pas rahne hi do jam-o-mina

kabhi tum ne dekhi hain pur-KHar rahen

jo kahte ho ulfat ko phulon ka zina

uDa li jo chori se galon ki chuTki

to bole 'kanwal' bhi hai kitna kamina