uD chaloge jo hue chehre pe gesu paida

uḌ chaloge jo hue chehre pe gesū paidā

tā.ir-e-husn karegā par-o-bāzū paidā

laakh dil chiir ke yak-laḳht jigar aatā hai

āñkheñ sau phoḌ ke ik hotā hai aañsū paidā

ashk-ālūda haiñ kyā kyā mirī mizhgān-e-darāz

dīda-e-tar ne kiye sarv-e-lab-e-jū paidā

bahr-e-qur.āñ to banānā thā ġhHilāf-e-qur.āñ

mus.haf-e-ruḳh pe ḳhudā ne kiye gesū paidā

na ye shoḳhī na ye vahshat na ye ġhamza na ye naaz

kyā ġhazālān-e-haram karte tirī ḳhū paidā

laakh fitnoñ se banāyā hai sarāpā terā

sau qayāmat se kiyā hai qad-e-dil-jū paidā

dhukdhukī dekhiye kis kis kā galā ghoñTegī

daaġh kyā kyā na karegā tirā jugnū paidā

mere vo haath jo ik din na ga.e paañv talak

merā vo sar hai ki jis ko nahīñ zaanū paidā

ab liyā chāhtā hai ashk tire chehre se rang

ab kiyā chāhtā hai daaġh tirī bū paidā

dard sā miltā hai kab mūnis-e-jān-e-ġhamnāk

zo.af sā hotā hai kab quvvat-e-bāzū paidā

be-muravvat haiñ zamāne ke hasīñ ai 'sho.ala'

dil-lagī kā nahīñ hotā koī pahlū paidā

uD chaloge jo hue chehre pe gesu paida

tair-e-husn karega par-o-bazu paida

lakh dil chir ke yak-laKHt jigar aata hai

aankhen sau phoD ke ek hota hai aansu paida

ashk-aluda hain kya kya meri mizhgan-e-daraaz

dida-e-tar ne kiye sarw-e-lab-e-ju paida

bahr-e-quran to banana tha ghHilaf-e-quran

mushaf-e-ruKH pe KHuda ne kiye gesu paida

na ye shoKHi na ye wahshat na ye ghamza na ye naz

kya ghazalan-e-haram karte teri KHu paida

lakh fitnon se banaya hai sarapa tera

sau qayamat se kiya hai qad-e-dil-ju paida

dhukdhuki dekhiye kis kis ka gala ghonTegi

dagh kya kya na karega tera jugnu paida

mere wo hath jo ek din na gae panw talak

mera wo sar hai ki jis ko nahin zanu paida

ab liya chahta hai ashk tere chehre se rang

ab kiya chahta hai dagh teri bu paida

dard sa milta hai kab munis-e-jaan-e-ghamnak

zoaf sa hota hai kab quwwat-e-bazu paida

be-murawwat hain zamane ke hasin ai 'shoala'

dil-lagi ka nahin hota koi pahlu paida