uD gai chehre ki rangat zard chehra ho gaya

uḌ ga.ī chehre kī rangat zard chehra ho gayā

kis liye kuchh din se gum-sum ho tumheñ kyā ho gayā

TuuT kar bikhre dhanak ke rang āñkhoñ meñ mirī

us ne jab añgḌā.ī lī mausam suhānā ho gayā

mohtaram thā ishq jab tak ḳhānqāhoñ meñ rahā

bārgāh-e-husn meñ aaya to rusvā ho gayā

sho.abada-bāzī ziyāda der tak chaltī nahīñ

jo tamāsha karne aaya ḳhud tamāshā ho gayā

istaqāmat ne liyā jis kī chaTānoñ se ḳhirāj

TuuT kar is tarah bikhrā reza-reza ho gayā

chaḌh ke aaya thā baḌī shiddat se dariyā-e-havas

jab merī tauba se Takrāyā to sahrā ho gayā

phuul sā chehra bas ik shab ḳhvāb meñ aaya mire

aur phir merā mirī nīñdoñ se jhagḌā ho gayā

ek sajda yuuñ adā ho ai mire parvardigār

tū kahe uTh jā mire bande ki sajda ho gayā

rāt-bhar ik dūsre se guftugū kī 'altamash'

aur phir bātoñ hī bātoñ meñ saverā ho gayā

uD gai chehre ki rangat zard chehra ho gaya

kis liye kuchh din se gum-sum ho tumhein kya ho gaya

TuT kar bikhre dhanak ke rang aankhon mein meri

us ne jab angDai li mausam suhana ho gaya

mohtaram tha ishq jab tak KHanqahon mein raha

bargah-e-husn mein aaya to ruswa ho gaya

shoabada-bazi ziyaada der tak chalti nahin

jo tamasha karne aaya KHud tamasha ho gaya

istaqamat ne liya jis ki chaTanon se KHiraj

TuT kar is tarah bikhra reza-reza ho gaya

chaDh ke aaya tha baDi shiddat se dariya-e-hawas

jab meri tauba se Takraya to sahra ho gaya

phul sa chehra bas ek shab KHwab mein aaya mere

aur phir mera meri nindon se jhagDa ho gaya

ek sajda yun ada ho ai mere parwardigar

tu kahe uTh ja mere bande ki sajda ho gaya

raat-bhar ek dusre se guftugu ki 'altamash'

aur phir baaton hi baaton mein sawera ho gaya