udas kamre ke kone kone mein jaise ghussa paDa hua hai

udaas kamre ke kone kone meñ jaise ġhussa paḌā huā hai

ye cup meñ chaa.e nahīñ hai parsoñ se ek lamha paḌā huā hai

hamārī bastī ke saare baasī na.e safar par nikal paḌe haiñ

purānī chaupāl meñ purānī parī kā qissa paḌā huā hai

adhūrī ulfat kā raaz hai ye ki sab adhūre hī rah ga.e haiñ

ye zard pattoñ meñ aadhā cigarette nahīñ hai misra paḌā huā hai

bichhaḌne vaale kī chārpā.ī se merī nazreñ lipaT ga.ī haiñ

kise ḳhabar hai ki chārpā.ī pe ek sadma paḌā huā hai

tumhārī jānib maiñ chalte chalte ab is dorāhe pe aa khaḌā huuñ

jahāñ pe aane na aane ke biich ek arsa paḌā huā hai

udas kamre ke kone kone mein jaise ghussa paDa hua hai

ye cup mein chae nahin hai parson se ek lamha paDa hua hai

hamari basti ke sare basi nae safar par nikal paDe hain

purani chaupal mein purani pari ka qissa paDa hua hai

adhuri ulfat ka raaz hai ye ki sab adhure hi rah gae hain

ye zard patton mein aadha cigarette nahin hai misra paDa hua hai

bichhaDne wale ki chaarpai se meri nazren lipaT gai hain

kise KHabar hai ki chaarpai pe ek sadma paDa hua hai

tumhaari jaanib main chalte chalte ab is dorahe pe aa khaDa hun

jahan pe aane na aane ke bich ek arsa paDa hua hai