uDe nahin hain uDae hue parinde hain

uḌe nahīñ haiñ uḌaa.e hue parinde haiñ

hameñ na chheḌ satā.e hue parinde haiñ

qafas meñ qaid karo yā hamāre par kaaTo

tumhāre jaal meñ aa.e hue parinde haiñ

havā chalegī to bachche uḌā.eñge un ko

ye kāġhazoñ se banā.e hue parinde haiñ

jame hue haiñ ye shāḳhoñ pe is tarah jaise

shajar ke saath ugaa.e hue parinde haiñ

falak pe jin ko sitāre samajh rahe haiñ log

vo chāñdnī meñ nahā.e hue parinde haiñ

bulandiyāñ haiñ hamāre mizāj meñ shāmil

bulandiyoñ se girā.e hue parinde haiñ

hamāre paas hī ā.eñge lauT kar 'bāqī'

hamāre jitne sadhā.e hue parinde haiñ

uDe nahin hain uDae hue parinde hain

hamein na chheD satae hue parinde hain

qafas mein qaid karo ya hamare par kaTo

tumhaare jal mein aae hue parinde hain

hawa chalegi to bachche uDaenge un ko

ye kaghazon se banae hue parinde hain

jame hue hain ye shaKHon pe is tarah jaise

shajar ke sath ugae hue parinde hain

falak pe jin ko sitare samajh rahe hain log

wo chandni mein nahae hue parinde hain

bulandiyan hain hamare mizaj mein shamil

bulandiyon se girae hue parinde hain

hamare pas hi aaenge lauT kar 'baqi'

hamare jitne sadhae hue parinde hain