ufuq par tulu-e-sahar dekhte hain

ufuq par tulū-e-sahar dekhte haiñ

bas ik ḳhvāb hai raat bhar dekhte haiñ

zamīñ par to ḳhāna-badoshī hai apnī

falak se pare apnā ghar dekhte haiñ

hamārī nazar āḳhirī daav par hai

abhī zer haiñ par zabar dekhte haiñ

zabāñ aur hī kuchh bayāñ kar rahī hai

ham ahl-e-nazar haiñ nazar dekhte haiñ

bahut TuuT kar ham ne rishte nibhā.e

zarā ek din toḌ kar dekhte haiñ

ab ā.īna hāthoñ meñ rakhte nahīñ ham

hathelī pe dastār-o-sar dekhte haiñ

haiñ 'iqbāl' kuchh aise manzar bhī jin ko

nahīñ dekhnā thā magar dekhte haiñ

ufuq par tulu-e-sahar dekhte hain

bas ek KHwab hai raat bhar dekhte hain

zamin par to KHana-badoshi hai apni

falak se pare apna ghar dekhte hain

hamari nazar aaKHiri daw par hai

abhi zer hain par zabar dekhte hain

zaban aur hi kuchh bayan kar rahi hai

hum ahl-e-nazar hain nazar dekhte hain

bahut TuT kar hum ne rishte nibhae

zara ek din toD kar dekhte hain

ab aaina hathon mein rakhte nahin hum

hatheli pe dastar-o-sar dekhte hain

hain 'iqbaal' kuchh aise manzar bhi jin ko

nahin dekhna tha magar dekhte hain