ujagar ho gae ruKH zindagi ke

ujāgar ho ga.e ruḳh zindagī ke

vagarna the irāde ḳhud-kushī ke

mile haiñ un se mauqe dostī ke

baḌe mamnūn haiñ ham zindagī ke

ye maidān-e-vafā hī hai vo maidāñ

jahāñ khulte haiñ jauhar aadmī ke

karam ai suḳhanī-e-rāh-e-mohabbat

qadam tharrā ga.e haiñ zindagī ke

qadam chūmegī baḌh kar kāmyābī

irāde kījiye manzil-rasī ke

nigāh-e-nāz ne karvaT jo badlī

badal kar rah ga.e ruḳh zindagī ke

rah-e-insāniyat meñ itifāqan

nikal aa.e haiñ goshe kajravī ke

halākat thī jahāñ ham-rañg-e-manzil

kuchh aise moḌ aa.e zindagī ke

ba-zāhir dekhne meñ dostī hai

diloñ meñ faisle haiñ dushmanī ke

salāmat haiñ agar merī vafā.eñ

badal jā.eñge pahlū be-ruḳhī ke

tamavvul kī ināyat par na jaanā

ulajh jaate haiñ dāman be-kasī ke

huī hai 'mauj' mushkil zindagānī

sile ye pā rahā huuñ dostī ke

ujagar ho gae ruKH zindagi ke

wagarna the irade KHud-kushi ke

mile hain un se mauqe dosti ke

baDe mamnun hain hum zindagi ke

ye maidan-e-wafa hi hai wo maidan

jahan khulte hain jauhar aadmi ke

karam ai suKHani-e-rah-e-mohabbat

qadam tharra gae hain zindagi ke

qadam chumegi baDh kar kaamyabi

irade kijiye manzil-rasi ke

nigah-e-naz ne karwaT jo badli

badal kar rah gae ruKH zindagi ke

rah-e-insaniyat mein itifaqan

nikal aae hain goshe kajrawi ke

halakat thi jahan ham-rang-e-manzil

kuchh aise moD aae zindagi ke

ba-zahir dekhne mein dosti hai

dilon mein faisle hain dushmani ke

salamat hain agar meri wafaen

badal jaenge pahlu be-ruKHi ke

tamawwul ki inayat par na jaana

ulajh jate hain daman be-kasi ke

hui hai 'mauj' mushkil zindagani

sile ye pa raha hun dosti ke