ujle mathe pe nam likh rakkhen

ujle māthe pe naam likh rakkheñ

ḳhvāhishoñ kā maqām likh rakkheñ

phir havas ko hai hasrat-e-parvāz

aap dāna-o-dām likh rakkheñ

varna ham is ko bhuul jā.eñge

sabz harfoñ meñ naam likh rakkheñ

jaane kis samt kal havā le jaa.e

lamha-e-shād-kām likh rakkheñ

apne hone kā kuchh yaqīñ kar leñ

ret par naqsh-o-nām likh rakkheñ

shab ko ThiThureñge sab dar-o-dīvār

dhuup kuchh apne naam likh rakkheñ

zardiyāñ oḌhne lagā sūraj

nāma-e-ḳhauf-e-shām likh rakkheñ

piile piile badan huā mausam

piilā piilā tamām likh rakkheñ

aane vaale udaas nasloñ ke

silsila-vār naam likh rakkheñ

ujle mathe pe nam likh rakkhen

KHwahishon ka maqam likh rakkhen

phir hawas ko hai hasrat-e-parwaz

aap dana-o-dam likh rakkhen

warna hum is ko bhul jaenge

sabz harfon mein nam likh rakkhen

jaane kis samt kal hawa le jae

lamha-e-shad-kaam likh rakkhen

apne hone ka kuchh yaqin kar len

ret par naqsh-o-nam likh rakkhen

shab ko ThiThurenge sab dar-o-diwar

dhup kuchh apne nam likh rakkhen

zardiyan oDhne laga suraj

nama-e-KHauf-e-sham likh rakkhen

pile pile badan hua mausam

pila pila tamam likh rakkhen

aane wale udas naslon ke

silsila-war nam likh rakkhen