ulaT gaya hai har ek silsila nishane par

ulaT gayā hai har ik silsila nishāne par

charāġh ghaat meñ haiñ aur havā nishāne par

ġhazal meñ us ko sitam-gar kahā to ruuTh gayā

chalo ye harf-e-malāmat lagā nishāne par

maiñ apne siine se sharminda hone vaalā thā

ki aa lagā koī tīr-e-jafā nishāne par

ḳhudā se āḳhirī rishta bhī kaT na jaa.e kahīñ

ki ab ke hai mirā dast-e-duā nishāne par

vo sho.ala apnī hī tezī meñ jal bujhā varna

rakhā thā ḳhema-e-sabr-o-razā nishāne par

maiñ intizār meñ huñ kaun use shikār kare

bahut dinoñ se hai merī navā nishāne par

ulaT gaya hai har ek silsila nishane par

charagh ghat mein hain aur hawa nishane par

ghazal mein us ko sitam-gar kaha to ruTh gaya

chalo ye harf-e-malamat laga nishane par

main apne sine se sharminda hone wala tha

ki aa laga koi tir-e-jafa nishane par

KHuda se aaKHiri rishta bhi kaT na jae kahin

ki ab ke hai mera dast-e-dua nishane par

wo shoala apni hi tezi mein jal bujha warna

rakha tha KHema-e-sabr-o-raza nishane par

main intizar mein hun kaun use shikar kare

bahut dinon se hai meri nawa nishane par