ulfat-e-ariz-e-laila mein pareshan nikla

ulfat-e-āriz-e-lailā meñ pareshāñ niklā

qais mānind-e-sahar chāk-garebāñ niklā

ban ga.e ḳhuub hadaf us sitam-ījād ke aap

lījiye hazrat-e-dil aaj to armāñ niklā

na huī tāqat-e-nazzāra kisī āshiq ko

shola-e-husn hijāb-e-ruḳh-e-jānāñ niklā

aa ga.ī sadma-e-furqat se ajal āshiq kī

hijr-e-mahbūb firāq-e-jasad-o-jāñ niklā

ruuh ne ḳhāna-e-tan chhoḌ diyā āḳhir-kār

mezbāñ ham jise samjhe the vo mehmāñ niklā

sāf-dil bahr-e-jahāñ meñ nahīñ rakhte daulat

chashma-e-mahr se kab gauhar-e-ġhaltāñ niklā

tū vo hai husn meñ yaktā ki tajassus meñ tire

āsmāñ le ke charāġh-e-mah-e-tābāñ niklā

vo parī-rū huā qismat se mirī merā mutī.a

ḳhat-e-taqdīr ḳhat-e-mohr-e-sulaimāñ niklā

mere marne se hue saikḌoñ armān shahīd

'ālim' anjām meñ dil ganj-e-shahīdāñ niklā

ulfat-e-ariz-e-laila mein pareshan nikla

qais manind-e-sahar chaak-gareban nikla

ban gae KHub hadaf us sitam-ijad ke aap

lijiye hazrat-e-dil aaj to arman nikla

na hui taqat-e-nazzara kisi aashiq ko

shola-e-husn hijab-e-ruKH-e-jaanan nikla

aa gai sadma-e-furqat se ajal aashiq ki

hijr-e-mahbub firaq-e-jasad-o-jaan nikla

ruh ne KHana-e-tan chhoD diya aaKHir-kar

mezban hum jise samjhe the wo mehman nikla

saf-dil bahr-e-jahan mein nahin rakhte daulat

chashma-e-mahr se kab gauhar-e-ghaltan nikla

tu wo hai husn mein yakta ki tajassus mein tere

aasman le ke charagh-e-mah-e-taban nikla

wo pari-ru hua qismat se meri mera mutia

KHat-e-taqdir KHat-e-mohr-e-sulaiman nikla

mere marne se hue saikDon arman shahid

'alim' anjam mein dil ganj-e-shahidan nikla