ulfat se ho KHak hum ko lahna

ulfat se ho ḳhaak ham ko lahnā

qismat meñ to hai azaab sahnā

dhyān us ke meñ ham ko sar-ba-zānū

āñkheñ kiye band baiThe rahnā

muñh chāhiye chāhne ko yuuñ jī

kyā tum ne kahā ye phir to kahnā

allāh-re sādgī kā aalam

darkār nahīñ kuchh us ko gahna

kar band na ashk-e-chashm-e-tar ko

behtar nāsūr kā hai bahnā

qaa.em rahe kyā imārat-e-dil

buniyād meñ to paḌā hai Dhahnā

shab ghar jo rahā mire vo mehmāñ

thā sub.h ye kis adā se kahnā

tāqat na rahī badan meñ he he

qurbān kiyā thā yaañ kā rahnā

dil ne bhī diyā na saath 'jur.at'

kyā dosh kisī ko diije lahnā

ulfat se ho KHak hum ko lahna

qismat mein to hai azab sahna

dhyan us ke mein hum ko sar-ba-zanu

aankhen kiye band baiThe rahna

munh chahiye chahne ko yun ji

kya tum ne kaha ye phir to kahna

allah-re sadgi ka aalam

darkar nahin kuchh us ko gahna

kar band na ashk-e-chashm-e-tar ko

behtar nasur ka hai bahna

qaem rahe kya imarat-e-dil

buniyaad mein to paDa hai Dhahna

shab ghar jo raha mere wo mehman

tha subh ye kis ada se kahna

taqat na rahi badan mein he he

qurban kiya tha yan ka rahna

dil ne bhi diya na sath 'jurat'

kya dosh kisi ko dije lahna